Барча карта эгаларини янада ҳушёр ва маъсулиятли бўлишга чақирамиз, деб огоҳлантирмоқда Ягона умумреспублика процессинг маркази.

Қайд этилишича, шу кунларда «Telegram» мессенжери орқали ноқонуний пул йиғимларини ташкиллаштирган гуруҳ аъзоларининг навбатдаги ҳаракатлари аниқланган ва уларни бартараф қилиш чоралари кўрилмоқда. Жумладан, мессенжерда футбол бўйича Россияда бўлиб ўтаётган Жаҳон чемпионати ўйинлари башорати учун пул тикишни таклиф этаётган гуруҳ пайдо бўлган. Уларнинг аъзолари ҳар бир футбол учрашувидан олдин, «картадан картага пул ўтказиш» хизмати орқали маблағ кўчиришга чақирилган.

Процессинг маркази мутахассислари томонидан бу борадаги ноқонуний ҳаракатларни бартараф қилиш бўйича чоралар кўрилгунига қадар ушбу эълонга чув тушганлар ҳам бщлган. Айрим «башоратчи» карта эгалари маълум миқдорда пулни ўтказишга улгурган.

Маълумот учун, Ўзбекистон Республикаси Жиноят кодексининг «Қимор ва таваккалчиликка асосланган бошқа ўйинларни ташкил этиш ҳамда ўтказиш» номли 278-моддасига биноан ноқонуний қимор ўйинларини ташкиллаштириш ҳамда уларни ўтказиш билан шуғулланган қонунбузарларга нисбатан етти йилгача қамоқ жазоси белгиланади.

Юқоридаги омилларни инобатга олган ҳолда, Ягона умумреспублика процессинг маркази барча карта эгаларидан қонунчиликда белгиланган меъёрларга хилоф фаолият олиб бораётган ҳаракатларда қатнашмасликка чақирди. Шунингдек, ноқонуний ўйинларда иштирок этиш юзасидан барча масъулият иштирокчи карта эгасининг зиммасида қолиши эслатилди.