Xabarlar tezkor Telegram kanalimizda Obuna bo'lish ×

Prezident yiliga 15,6 ming tonna ip-kalava ishlab chiqaradigan korxona faoliyati bilan tanishdi

Prezident yiliga 15,6 ming tonna ip-kalava ishlab chiqaradigan korxona faoliyati bilan tanishdi

Foto: Prezident matbuot xizmati

Prezident Shavkat Mirziyoyev Namangan viloyatiga tashrif davomida To‘raqo‘rg‘on tumanidagi «FT Textile group» qo‘shma korxonasi faoliyati bilan tanishdi.

«Shahand» qishloq fuqarolar yig‘inidagi korxona binosi bir paytlar qarovsiz holda edi. Davlatimiz rahbarining har bir hududdagi mavjud imkoniyatlarni ishga solib, aholini ish bilan ta’minlashga qaratilgan siyosati natijasida ushbu inshoot mahalliy tadbirkorga berilgandi. Tez orada bino ta’mirlanib, Germaniyadan zamonaviy ip yigiruv mashinalari keltirib o‘rnatildi. Boshqa uskunalar Belgiya, Shveysariya, Hindiston va Turkiyadan olib kelindi. Shu tariqa o‘tgan yili korxonaning birinchi bosqichi ishga tushirildi. Yon-atrofdagi Bog‘ishamol, Dukat, Temirqishloq, Olchin, Axsi kabi mahallalarda yashovchi 300 kishi doimiy ish bilan ta’minlandi.

Foto: Prezident matbuot xizmati

Bugungi kunda korxonada yiliga 15,6 ming tonna ip-kalava ishlab chiqarilmoqda. Ular Xitoy, Rossiya, Turkiya va Ukrainaga eksport qilinmoqda. O‘tgan yili 10 million dollarlikdan ziyod mahsulot chet ellarga yetkazib berilgan. Korxonaning ikkinchi bosqichida yiliga yana 20,8 ming tonna ip-kalava ishlab chiqarish, 200 ta qo‘shimcha ish o‘rni yaratish rejalashtirilgan.

Yana bir muhim tomoni, ushbu korxona elektr energiyasi bilan o‘zini o‘zi ta’minlaydi. Bu yerga Germaniyadan eng zamonaviy gazogenerator keltirib o‘rnatilgan. Ish jarayonida paydo bo‘ladigan issiq suv ham behuda ketmaydi. 9 gektar issiqxonani isitadi.

Shu yerda O‘zbekistonning xorijiy mamlakatlardagi elchixonalari bilan hamkorlikda Namangan viloyatida amalga oshiriladigan investitsiyaviy loyihalar taqdimoti ham o‘tkazildi. Ularga muvofiq, 43 ta istiqbolli loyihani amalga oshirish ko‘zda tutilgan. Bundan tashqari, «O‘zavtosanoat» AJ tomonidan avtomobillar yoritish chiroqlari, «Norin moto bayk» korxonasida moped, skuter, mototsikl va motorollerlar, Pop tumanidagi «Uz youcheng group» qo‘shma korxonasida tikuvchilik dastgohlari ishlab chiqarish kabi ko‘plab loyihalar haqida ma’lumot berildi.

Prezident ushbu loyihalarni sifatli amalga oshirish yuzasidan topshiriqlar berdi.

Foto: Prezident matbuot xizmati
Foto: Prezident matbuot xizmati

 

Izohlar 0

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring