Qashqadaryo viloyat rahbarlari «tushlik pulini bermayapti»
Qarshilik tadbirkor, «Magnit» choyxonasi rahbari Yoshlar ishlari agentligining Qashqadaryo boshqarmasi o‘tkazgan 2 ta tadbir pulini qariyb 9 oydan beri ololmay sarson bo‘lmoqda.
Bu haqda blogerlar Husan Komiljonov va Kapitan Karimov ma’lum qilishgan.
Xabarlarga ko‘ra, Yoshlar ishlari agentligining Qashqadaryo boshqarmasi o‘tkazgan 2 ta tadbirning tushlik puli, salkam 20 mln so‘mga yaqin mablag‘ 9 oydan beri to‘lab berilmagan. Bu haqda viloyat hokimi o‘rinbosari Rustam Yo‘ldoshev va agentlik rahbari Temur Poyonovga 5 oy avval blogerlar xabar bergan.
«Prezident tadbirkorlarni qo‘llab-quvvatlaylik deydilar. Lekin Qarshi shahrida tadbirkor 9 oydan beri aziyat chekmoqda. Prezident siyosatiga xiyonatmi bu?» — deb yozadi Husan Komiljonov.
«Viloyat hokimi o‘rinbosari Rustam Yo‘ldoshevni hamda Yoshlar ishlari agentligi viloyat boshqarmasi rahbari Temur Poyonovni ham bu muammodan xabari bor. Poyonovning rahbarlik lavozimiga tayinlanganiga 6 oyga yaqinlashdi. Ammo shu paytgacha tadbirkorning muammosi hal etilmadi. Choyxona pulini to‘lash qo‘lidan kelmas ekan, ishtirokchilardan tushlik pulini yig‘ib olish kerak edi», — deb yozadi Kapitan Karimov.
Eslatib o‘tamiz, Qashqadaryoda 2020-yil 18-dekabrdan 26-dekabrgacha «Yoshlar festivali» o‘tkazilgandi. Tashkiliy ishlar Qashqadaryo viloyati hokimi o‘rinbosari Rustam Yo‘ldoshev zimmasiga yuklatilgandi.
Ammo Rustam Yo‘ldoshevning e’tiborsizligi viloyatdagi ayrim blogerlarning tanqidlariga uchragandi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter