Termiz shahridagi «Matbuot uyi» binosida joriy yilning 5-10 aprel kunlari Surxondaryo viloyatida o‘tkaziladigan birinchi Xalqaro baxshichilik san’ati festivali oldidan «Alpomish» dostoni kitobining taqdimoti bo‘lib o‘tdi. Unda viloyat hokimligi, Respublika ma’naviyat-ma’rifat markazi viloyat bo‘limi, xodimlari, shoir, yozuvchilar, OAV vakillari va yoshlar ishtirok etishdi.

O‘zbekiston xalq baxshisi Abdunazar Poyonov talqinida millatning ezgu orzu umid, intilishlarini, jasorati va mardligini tom ma’noda o‘zida mujassam etgan ushbu doston Surxondaryo viloyati hokimligi, Respublika ma’naviyat-ma’rifat markazi viloyat bo‘limi tomonidan nashrga tayyorlanib, «Akademnashr» nashriyotida 1000 nushada chop etildi.

Kitob taqdimotida so‘zga chiqqanlar, «Alpomish» dostonning o‘quvchilar qo‘liga yetib borgunga qadar jarayonlar, asarning syujeti va boshqa variantlaridan farqli jihatlarini aytib o‘tishdi.

«Voqealarning izchilligi og‘zaki nusxadan qog‘ozga ko‘chganida ham tabiiyligini saqlab qolgan va har bir so‘zga ramz yuklatilgan. Obrazlarning jonlantirilishi haqchil tarzda amalga oshirilgan. Buni yozib oluvchining yutug‘i sifatida baholash lozim», - deydi Respublika Ma’naviyat-ma’rifat markazi Surxondaryo viloyati bo‘limi boshlig‘i Firdavs Sharipov. Endilikda ushbu dostonning bir necha baxshi-shoirlarimiz talqinida chop etilishi rejalashtirilgan.

Folklorshunos olimlarning e’tirof etishicha, hozirgi kunda ushbu dostonning qirqdan ortiq varianti mavjud. Shuningdek, Surxon baxshichilik maktabi vakillari tomonidan dostonning bir necha talqinlari yaratilgan.

Shuni alohida ta’kidlash joiz, «Alpomish» asarining baxshi-shoirlar tomonidan kuylangan talqinlarida syujet voqealari o‘zgargarmaydi, aksincha, badiiy ifodasi jihatidan xalq baxshilarining so‘z qochirimlari bilan mukamallashib, vaqt, davr makonga qarab, ijro vaqtida boyitilib boradi. Shu sababli olimlar tomonidan ularning har birini mustaqil badiiy asar sifatida o‘rganib kelinmoqda.

«Surxon vohasi xalq og‘zaki ijodining beqiyos namunalari yaratilgan. Shular orasida «Alpomish» dostonimizning shu vaqtga qadar badiiy jihatdan mukammal talqini kitob holatiga keltirilmagan, chop etilganlari ham tan olinmasdan kelingandi. Men bugungi kunga qadar 30ga yaqin dostonlarni bilaman. Va shulardan to‘rttasi chop etildi.Qolganlari ham yaqin kunlarda kitobsevarlarga taqdim etiladi», - deydi O‘zbekkiston Xalq baxshisi Abdunazar Poyonov.

Aytish kerak, asrlar davomida xalq tilida, unga tushunarli qilib aytilgan dostonlar qadimiy tuproqda yashagan har bir inson qalbining nozik torlarini chertishi bilan bilan birgalikda, bugungi avlodni vatanparvarlik, millatga sadoqat ruhida tarbiyalashda muhim vositalardan biri bo‘lib xizmat qiladi.

O‘zbek xalq qahramonlik dostonining chop etilib, keng jamoatchilikka taqdim etilishi festival oldidan xalqimiz uchun munosib sovg‘a bo‘ldi deyish mumkin.

Nargiza RAHMATULLAYeVA