O‘zbekiston Milliy gvardiyasi hamda boshqa xavfsizlik kuchlari AQSh Qurolli kuchlari Markaziy qo‘mondonligi bilan inqirozga qarshi qo‘shma mashqlar o‘tkazdi. Bu haqda AQShning Toshkentdagi elchixonasi matbuot xizmati xabar beradi.

24-fevraldan 2 martga qadar davom etgan va «Yengilmas soqchi – 2020» deb atalgan mashqlar ikki davlat o‘rtasida xavfsizlik bo‘yicha hamkorlik aloqalarini mustahkamlash va o‘zaro muvofiqlikni oshirish maqsadida tashkil etildi.  

Harbiy mashg‘ulotlar dala-o‘quv poligonlari va O‘zbekiston hukumati ruxsat bergan  boshqa ob’yektlarda uyushtirildi. Ayrim amerikalik harbiylar ushbu mashg‘ulotlarda Florida shtati Tampa shahridagi «MakDill» avibazasida masofadan turib  qatnashdi.

«O‘zbekiston bilan harbiy hamkorligimiz o‘zaro hurmat va mushtarak manfaatlarga asoslangandir. «Yengilmas soqchi» mashqlari kabi o‘quv dasturlari va qo‘shma javob mashqlari bizning O‘zbekiston bilan xavfsizlik sohasidagi  hamkorligimiz chuqur va kengligini ko‘rsatadi», – deydi AQShning yurtimizdagi favqulodda va muxtor elchisi Daniel Rozenblyum.

Qayd etilishicha, «Yengilmas soqchi» harbiy mashqlari har ikki mamlakat xavfsizlik kuchlari uchun notanish muammolarga duch kelganda  tezkorlikni oshirish  va harbiylar o‘rtasidagi o‘zaro hamkorlikni kengaytirishga imkon berdi. Bu kabi  qo‘shma harbiy mashg‘ulotlar zarurat tug‘ilganda birgalikda harakat qilish  uchun hamkor davlat harbiy xizmatchilarini  tayyorlashda qo‘l keladi.

Ma’lumotlarga qaraganda, amerikalik harbiylar har yili AQSh Qurolli kuchlari Markaziy qo‘mondonligi mas’ul bo‘lgan hududlarda hamkor davlatlar bilan 80 dan ortiq mashg‘ulotlarda ishtirok etadi.