Milliy olimpiya qo‘mitasi matbuot xizmatining xabar berishicha, tashkilot futbol bo‘yicha O‘zbekiston olimpiya terma jamoasi bosh murabbiyligi uchun nomzod bo‘lib turgan Lyubinko Drulovich bilan kelishuvga erishgan. 

Bugun, 23-yanvar kuni Milliy olimpiya qo‘mitasida serbiyalik murabbiy  Lyubinko Drulovich bilan rasman shartnoma imzolash marosimi tashkil qilindi. Unda O‘zbekiston Milliy olimpiya qo‘mitasi prezidenti va O‘zbekiston futbol assotsiatsiyasining birinchi vitse-prezidenti Umid Ahmadjonov, murabbiy Lyubinko Drulovich va uning yordamchilari, O‘FA mutasaddilari ishtirok etishdi.

Umid Ahmadjonov marosimda asosiy maqsad Tokio-2020 Olimpiadasiga yo‘llanma olish va bu yo‘lda terma jamoamiz uchun barcha sharoitlar yaratilishini ma’lum qilgan. Drulovichga murabbiylar shtabida o‘zbekistonlik mutaxassis Ravshan Haydarov yordam beradi. 

Yangi murabbiy bilan kelishuv Tokio-2020 Olimpiadasiga qadar amal qiladi.

Ma’lumot uchun:

Lyubinko Drulovich

Fuqaroligi: Serbiya

Tug‘ilgan sanasi: 11-Sentyabr 1968 (50 yosh)

Murabbiylik darajasi: UYeFA «PRO» diplomi egasi (2007 yil)

Eng katta yutug‘i: Serbiya U-19 terma jamoasi bilan Yevropa chempionatida g‘oliblikka erishgan

Murabbiy sifatida erishgan yutuqlari:

1. Angola Superkubogi G‘olibi – «Agosto» FK 2010-2011
2. Yevropa U-19 Chempionati g‘olibi – Serbiya 2013
3. «Partizan» FK bilan Yevropa ligasi ishtirokchisi – 2015-2016
4. BAA U-19 bilan final qismiga yo‘l olgan – 2017 yil

Shaxsiy yutuqlari:

Serbiyada yilning eng yaxshi murabbiyi – 2013 yil.