«O‘zbekiston temir yo‘llari» AJ Navro‘z bayrami munosabati bilan 21—24-mart kunlari ichki reyslarga chegirmalar joriy etdi. Bu haqda kompaniya matbuot xizmati xabarida ma’lum qilingan.

Chegirmalardan quyidagi tartibda joriy etilgan:

-pensionerlar, nogironlar, 1941—1945-yillardagi urush qatnashchilari va ularga tenglashtirilgan shaxslar — 50 foiz chegirma;

-maktab o‘quvchilari, kollej, litsey va OTMlar talabalari, IIV, Mudofaa vazirligi, DXX, Davlat soliq qo‘mitasi, Davlat bojxona qo‘mitasi va boshqa mahkamalar tizimidagi maxsus ta’lim muassasalari o‘quvchilari va tinglovchilari (guvohnomalar taqdim etilganda) — 15 foiz;

-oilalar (ikki kishidan — er va xotin, er, xotin va ularning 18 yoshgacha bolalari; 18 yoshgacha farzandi bilan ota yoki ona, nikoh to‘g‘risidagi guvohnoma taqdim etilganda) — 15 foiz;

-jamoalar (to‘rt va undan ortiq kishi) — 15 foiz.

Qo‘shimcha qilinishicha, «Afrosiyob» tezyurar elektropoyezdlarining barcha toifadagi yo‘lovchilariga 10 foizlik chegirmalar taqdim etiladi.

Kuni kecha «O‘zbekiston temir yo‘llari» xalqaro yo‘nalishlarga chegirmalar e’lon qilgan edi.