«France Football» nashri ushbu mavsumda eng ko‘p daromad olgan futbolchi va murabbiylar ro‘yxatini e’lon qildi.

«L’Equipe» nashrida keltirilgan ro‘yxatga ko‘ra, ayni mavsumda eng ko‘p daromad olgan futbolchi — «Barselona» hujumchisi Lionel Messi bo‘lib turibdi. Uning 2017/18 yilgi mavsumda olgan daromadi 126 mln. yevroga teng. Bu — mutlaq rekord natijadir.

Messidan keyingi o‘rinni «Real» futbolchisi Krishtianu Ronaldu 94 mln. yevro daromad bilan egallagan. «Pari Sen-Jermen» hujumchisi Neymar esa ushbu mavsumda «bor-yo‘g‘i» 81,5 mln yevro miqdorida pul ishlab topgan.

Eng ko‘p daromad oluvchi murabbiylar ro‘yxatini «Manchester Yunayted» bosh murabbiyi Joze Mourinyu boshqarmoqda — u ushbu mavsumda 26 mln. yevro topgan. Xitoy terma jamoasi bosh murabbiyi Marchello Lippi esa 23 mln. daromad bilan ikkinchi o‘rinda. Uchinchi hamda to‘rtinchi o‘rinlar Ispaniyaga ketdi — «Atletiko» bosh murabbiyi Diyego Simeone (€ 22 mln) va «Real» ustozi Zinedin Zidan ushbu o‘rinlarga loyiq topilgan.