Toshkentdagi “Universal” sport majmuasida MDHga a’zo davlatlar do‘stona armiyalari o‘rtasidagi armiya qo‘l jangi musobaqasiga start berildi. Bu haqda Mudofaa matbuot xizmati xabar berdi.

Chempionatning ochilishida Toshkent harbiy okrugi harbiy xizmatchilarining, shuningdek, sportning turli yo‘nalishlari bo‘yicha Mudofaa vazirligi sport klubining bolalar sporti maktabi tarbiyalanuvchilarining ko‘rgazmali chiqishlari tomoshabinlar e’tiboriga havola etildi.

O‘zbekiston Respublikasi Qurolli Kuchlar Markaziy ashula va raqs ansamblining chiqishlari hamda ishtirokchi davlatlarning xalq qo‘shiqlari ijro etildi.

Musobaqada Rossiya Federatsiyasi,  Belarus, Qozog‘iston, Qirg‘iziston, Tojikiston hamda O‘zbekiston Respublikalarining qo‘l jangi sporti ustalari ishtirok etmoqda.

10 sentyabr kuni O‘zbekiston Qurolli Kuchlari akademiyasida bo‘lib o‘tgan qur’a tashlash yakunlariga ko‘ra dastlabki krug janglarida o‘zbekistonlik harbiy xizmatchilar tatamiga chiqmadi. Ikkinchi krugdan boshlab yetti vazn toifasida O‘zbekiston Mudofaa vazirligi harbiy xizmatchilari bahslarga kirishdi.