Jazoir konstitutsiyaviy sudi ikki nomzod tomonidan mamlakat prezidentligi saylovida ishtirok etish uchun berilgan arizani rad etdi. Shu tariqa 4 iyulga belgilangan saylov boshqa vaqtga qoldirildi.

Jazoir prezidentligi uchun taniqli siyosatchilar o‘z nomzodini qo‘yishni istamadi. Shundan so‘ng u qadar taniqli bo‘lmagan Abdulhakim Xamad va Xamid Tuaxri o‘z nomzodlarini ilgari surgan edi. Ular o‘z arizalarida ilova tariqasida shaxsiy hujjatlari, sog‘ligi to‘g‘risida ma’lumotnoma, 60 ming fuqaro yoki 600 deputatning qo‘llab-quvvatlagani to‘g‘risida imzo taqdim etishgan. Ammo konstitutsiyaviy sud bu arizalarni rad etdi.

Jazoirda 82 yoshli prezident Abdulaziz Buteflika muddatidan avval vakolatidan voz kechganidan so‘ng siyosiy inqiroz boshlangan edi. U 1999 yildan buyon mamlakatni boshqarib kelayotgan edi, ammo fevral oyida boshlangan ommaviy noroziliklar tufayli mamlakat boshqaruvidan ketdi.

Ayni vaqtda mamlakatni vaqtincha parlament spikeri Abdulqodir Bensalax boshqarib kelmoqda.