Hindistonning Chennai (sobiq Madras) shahrida 9 million odam istiqomat qiladi. Hozir bu yerda o‘tkir suv taqchilligi kuzatilmoqda. Megapolisdagi hayot deyarli to‘xtab qolgan: ko‘plab budjet tashkilotlari, kafelar, restoranlar va mehmonxonalar yopilmoqda.

Shahar hokimiyati suv ta’minotini 40 foizga kamaytirgan. Butun shahar bo‘ylab konditsionerlar o‘chirilgan, kasalxonalar esa bemorlarni qabul qilishga ulgurmayapti. Ko‘plab kompaniyalar xodimlarni uyga jo‘natib yubordi.

IT sohasida faoliyat olib boradigan mahalliy mutaxassislar assotsiatsiyasi rahbari Vinot Kaligayning BBC nashriga ma’lum qilishicha, kompyuter firmalari xodimlari imkon qadar uyda turib ishlamoqda. Ammo bu holat vaziyatni o‘nglash uchun yetarli emas.

«Axir uyda ham vaqti kelib suv tugaydi. O‘shanda biz nima qilamiz?» — deydi Kaligay.

Hindistonda anomal jazirama may oyining o‘rtalarida boshlangan edi. Qurg‘oqchilik natijasida bir necha o‘nlab odamlar qurbon bo‘ldi. 10 iyunda mamlakat poytaxti Nyu-Dehli shahrida issiq ko‘rsatkichi soyada 48 daraja bo‘ldi. Bu rekord demakdir. Hindistonning shimoli-g‘arbidagi Churu shahrida esa termometr 50 darajaga qadar ko‘tarildi.

Global iqlim o‘zgarishi tufayli yil o‘tgani sari yog‘ingarchilik tobora kamroq va qisqa muddatli bo‘lib bormoqda. Ichimlik suvi yetishmovchiligi esa shuningdek yana Moskva, Pekin, Istanbul, London va Tokioga ham xavf solmoqda. O‘tgan yili tarixda birinchi marta zamonamizning yirik shahrida suv tugab qoldi — Janubiy Afrika Respublikasining Keyptaun shahrida muammolar yuzaga kelgan edi.