Жанубий Корея полицияси 1990-йиллардан бери қидирилаётган «Хвасонлик серияли қотил»ни топди. Бу ҳақда «Chosun Ilbo» ёзмоқда.

Жиноятчи барча қотилликларни битта шаҳарда содир этгани учун шу номни олган. 1986—1991 йиллар давомида бу савдойининг қўлидан 14 ёшдан 71 ёшгача бўлган ўн нафар аёл ўлим топган.

Полиция хабарига кўра, улар узоқ йиллар қидирган жиноятчи кўпдан бери қамоқда ўтирган экан...

Генетик экспертизага кўра, очилмай қолган уч жиноят жойидан олинган ДНК намуналари миллий маълумотлар базасидаги намуналар билан бир хил чиққан. Аниқланишича, жиноятчи бу пайтга келиб қамоқда муддатни ўтаётган бўлган: 1994 йили у бир аёлни зўрлаш ва ўлдиришда айбли деб топилиб қамалган. «Хвасонлик қотил»нинг ҳам барча қурбонлари ана шундай ўлим топишган...

Машъум жиноятлар узоқ йиллар полиция ва қурбонларнинг яқинларига ҳаловат бермади. Жиноятчини тутишда ёрдам берганларга катта мукофот ҳам эълон қилинди, аммо натижа чиқмади.

Ҳатто шу воқеалар асосида Жанубий Корея тарихида энг кўп пул ишлаган «Қотиллик ҳақида хотиралар» (2003 й.) фильми суратга олинган.

Жиноятчи топилгани билан жазодан қутулиб қолиши мумкин: 2007 йилгача мамлакатда  содир этилган қотилликлар бўйича ишлар 15 йил муддатда ёпиларди, бу қонун 2015 йилга келиб бекор қилинган. «Хвасонлик қотил» содир этган охирги жиноятнинг «муддати» 2006 йилнинг апрелида тугаган.