Жаҳон соғлиқни сақлаш ташкилотининг (ЖССТ) маълум қилишича, Конгонинг Шимолий Киву ва Итури провинцияларида ҳар ҳафта 86 киши Эбола вирусини юқтирмоқда.

Танзаниянинг «ZanzibarLeo» янгиликлар нашри ЖССТ ҳафталик баёнотига асосланиб, Конго ДР сарҳадлари ташқарисида ҳали бирорта ҳам касалликни юқтириш ҳолати қайд этилмаганини айтди.

ЖССТ, шунингдек, 21 кун ичида (17 июлдан 6 августгача) Эбола вирусини юқтирганлик бўйича 257 та янги ҳолат қайд этилганини маълум қилди. Улардан 116 нафари — Шимолий Киву вилоятидаги Бени шаҳри, яна 58 нафари — Итури провинциясида жойлашган Мандим шаҳри аҳолисига тааллуқли.

Шунга қарамай, Гом шаҳри аҳолисининг бирортасида касаллик аниқланмаган. Маълумки, у ерда вирусни тўрт киши юқтирган бўлиб, шулардан икки нафари вафот этган, яна икки нафари айни вақтда Эбола вирусини даволаш тиббиёт марказида муолажа олишмоқда.

ЖССТ хабарига кўра, Шимолий Киву вилояти, Ньирагонго туманида Эбола вируси билан оғриётган кишилар билан мустаҳкам алоқада бўлган 232 нафар киши мутахассисларнинг жиддий назорати остида.

Аниқланишича, вирусни юқтирган кишилар билан яқин алоқада бўлганликда гумон қилинаётган одамларнинг 98 фоизи вакцинациядан ўтган.

Эслатиб ўтамиз, Конго ДРда жами 2 781 киши вирусни юқтирган бўлиб, улардан 1 866 нафари ҳаётдан кўз юмган.