Мағлубият нималигини билмаган боксчи 24 ёшида ҳаётдан кўз юмди
Америкалик профессионал боксчи Трэвелл Мэзион йўл-транспорт ҳодисаси натижасида ҳалок бўлди, дея хабар берди «TMZ».
Бирор марта ҳам енгилмаган спортчи 24 ёшида ҳаётдан кўз юмди. Мэзионнинг автомобили қарама-қарши йўналишга чиқиб кетиб, «Nissan Sentra»ни уриб юборган, сўнг «Honda Pilot»га тўқнашган. Боксчи воқеа жойида ҳалок бўлган. Яна бир жабрланувчи — «Honda Pilot»нинг 61 ёшли ҳайдовчиси олган жароҳатлари натижасида шифохонада вафот этган.
Полиция икки кишининг ўлимига сабаб бўлган йўл-транспорт ҳодисасини текширмоқда. Мэзион бошқарувидаги «Cadillac» нима учун қарама-қарши йўналишга чиқиб кетгани ҳали аниқланмади.
Мэзион ўзининг охирги жангини 58 сонияда якунлаган. 2020 йил январь ойида Фернандо Кастанедани нокаутга учратган. Профессионал боксда америкалик мағлубият нималигини билмаган. Унинг ҳисобида 17 та жанг ва 17 та ғалаба бор.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter