Туркияда ишлаб чиқарилаётган автомобиллар 2023 йилнинг биринчи чорагида бозорларда пайдо бўлади. Маҳаллий матбуотга кўра, Бурсадаги автозавод 5 турдаги енгил машина ишлаб чиқариши кўзда тутилган.

Туркия 2018 йилдан миллий автосаноатни йўлга қўйиш борасида жиддий қадам ташлади. Ўша йили президент Ражаб Тоййиб Эрдўғон фармойиши билан Турк автомобили ташаббус гуруҳи (TOGG) тузилди. Беш саноат гиганти – Anadolu Group, BMC, Kök Group, Turkcell ҳамда Zorlu Holding миллий автомобиль саноатини йўлга қўйиш учун бир ёқадан бош чиқариб чора-тадбирлар кўришга киришди.

2020 йилнинг 18 июлида Бурса вилоятининг Гемлик туманида автозаводга тамал тоши қўйилди. Президент Эрдўғон автозавод бунёд этилишини 60 йиллик орзунинг рўёбга чиқиши деб баҳолаган. Шу йили C-SUV ва C-Sedan русумли илк автомобиллар тақдимоти ўтказилди.

Тўрт йиллик тайёргарлик жараёнидан кейин дастлабки натижалар маълум бўлмоқда. 2023 йилнинг биринчи чорагида SUV сотувга чиқарилади. Кейинроқ Sedan, Hatchback, B-SUV, C-MPV каби автоуловлар харидорларга етказилади. Шу тариқа дастлабки босқичда 5 русумдаги машиналар ишлаб чиқарилади. 4300 нафар ходим меҳнат қиладиган заводда йилига 175 минг дона автомобиль ишлаб чиқарилиши режалаштирилган. 2030 йилга бориб бу кўрсаткич бир миллион донага етказилади.

Аввалроқ TOGG бош директори Гюркан Каракаш муҳандислик нуқтаи назаридан оддий машина эмас, балки смарт автомобиль ишлаб чиқариш кўзда тутилганини маълум қилган эди. Эътиборга молик жиҳати, миллий автозаводнинг 75 фоиз эҳтиёт қисмлари Туркияда тайёрланади.

Эслатиб ўтамиз, TOGG  бренди жорий йил январь ойида АҚШ ўтказилган электроника кўргазмасида (Consumer Electronics Show) энг яхши брендлардан бири деб эътироф этилган эди.

Бунга қадар илк турк электромобили ҳам муваффақиятли тарзда синовдан ўтказилган.