Халқаро футбол ассоциациялари федерацияси (ФИФА) президенти Жанни Инфантино сўнгги жаҳон чемпионати доирасида ўзига қарши билдирилган танқидларга муносабат билдирди.

Ижтимоий тармоқда пост чоп этган Инфантино АҚШ, Мексика ва Канада мезбонлигида ўтган жаҳон чемпионатини (ЖЧ) “дунёдаги энг яхши шоу” деб атаган ва ҳакамлик, интизомий чоралар ҳамда бошқа можароларга оид эътирозларни рад этган.

Жаҳондаги миллионлаб мухлислар қизиқишини уйғотган ЖЧ можаролар, баҳсли қарорлар билан ҳам эътиборга тушди.

“Аслида ҳакамларнинг баҳсли қарорлари ёки “ғалати” интизомий ҳукмлар, масалан, эҳтимолий янглиш қизил ёки сариқ карточкалар ва айрим вазиятларда футболчиларни четлатмаслик ҳақидаги кейинги қарорлар оддий амалиёт ҳисобланади ва дунёнинг энг йирик лигаларининг айримларида кенг қабул қилинади”, –  дея ФИФАнинг баҳсли қарорларини оқлашга уринган Жанни Инфантино.

ФИФА раҳбари, шунингдек, Вашингтон ва Теҳрон ҳарбий зиддиятига қарамай, Эрон терма жамоаси ЖЧда қатнашганини ютуқ ўлароқ санаган. Аммо у Эрон терма жамоаси АҚШга виза олиш ва келиб-кетишда дуч келган қийинчиликлар масаласига тўхталмаган.  

Таҳлилчиларга кўра, ЖЧ-2026 сиёсатчилар кўп марта аралашган ва аралашишга уринган мусобақа сифатида тарихга кирди.  

Чемпионат арафасидаёқ АҚШ президентининг махсус вакили Паоло Замполли ЖЧда Эрон ўрнига Италия терма жамоасини тиқиштиришга уринди.

АҚШ термаси жамоаси вакили Фоларин Балоган билан боғлиқ можаро эса сиёсат ва спорт сарҳадлари қоришиб кетганини кўрсатди.

Балоган Босния ва Герцеговинага қарши учрашувда қизил карточка олгани учун Бельгия билан ўйинни ўтказиб юбориши керак эди. Бироқ ФИФА Интизом қўмитаси ФИФА Интизом кодексининг 27-моддасига таяниб, дисквалификация ижросини бир йиллик синов муддатига алмаштирди. Маълум бўлишича, АҚШ президенти Дональд Трамп Балоган масаласини қайта кўриб чиқиш юзасидан ФИФА раҳбариятига мурожаат қилгани ортидан шундай қарор қабул қилинган.

Бунинг ортидан Европа футбол уюшмалари иттифоқи (УЕФА) Балоганга нисбатан қабул қилинган қарор юзасидан ФИФАни кескин танқид қилди. УЕФА тарқатган баёнотда мазкур қарор “мисли кўрилмаган, тушунтириб бўлмайдиган ва асоссиз” деб баҳоланди.

Норвегия футбол ассоциацияси раҳбарияти эса ушбу ҳолат бўйича  Трамп устидан шикоят қилиш ниятини билдирди.

Бу йилги ЖЧнинг кумуш медали совриндори Аргентина термаси жамоасини ФИФА мусобақаларидан четлатишга доир петиция рекорд даражада – 23,3 миллионта овоз йиғди.

Кўп миллион сонли мухлислар ФИФА раҳбарияти ва ҳакамлар жамоасини машҳур футболчи Лионел Мессига ён босишда айблади. Хусусан, Лотин Америкаси давлатининг Швейцария ҳамда Мисрга қарши ўйинлардаги ғалабалари шубҳа уйғотган.

Дарвоқе, финал ўйинидан кейин ҳам Месси жамоадошлари можароли ҳолатни юзага келтирди. Хусусан, футболчилар Науэль Молина, Леандро Паредес ва Тьяго Альмада ҳамда Аргентина термаси бош мураббийи ёрдамчиси Роберто Аяла Испания футболчиларига нисбатан куч ишлатган.

Кучли норозилик ва тармоқлардаги босим ортидан ФИФА Аргентина футболчиларининг хатти-ҳаракати текширилишини маълум қилди.