Ҳозирги кунда аёллар орасида озиш учун турли дори воситаларини, ҳатто осма уколларни ҳам ўзбошимчалик билан қабул қилаётганлар жуда кўп. Энг ачинарлиси, бундай препаратларни шифокор назоратисиз, ўзбошимчалик билан қабул қилиш организмнинг барча ҳаётий тизимларини ишдан чиқариши ва ҳаёт учун хавфли оқибатларга олиб келишини улар яхши билишади.

Айниқса учта гуруҳга мансуб дорилар шунчаки оддий дори эмас, балки ҳужайра, гормон ва бактериялар даражасида ишлайдиган кучли кимёвий моддалардир.

Масалан, ҳозир аёллар орасида урфга айланган, косметологларнинг сеҳрли қуроли бўлишга улгурган “моунжаро“ препарати нотўғри қўлланилганда гипогликемия (қонда қанд миқдорининг кескин тушиб кетиши, ўткир панкреатит, буйрак етишмовчилиги ва ҳатто ошқозон парезига олиб келиши мумкин.

Биласизми, антибиотиклар фақат бактериал инфекцияларни даволаш учун мўлжалланган. Уларни шамоллаш, грипп ёки ҳар қандай иситмада ичиш эса бир қатор салбий оқибатларга олиб келади.

Жумладан, антибиотикка чидамлилик (резистентлик) — бактериялар дорига мослашиб, кучлироқ бўлиб олади. Келажакда ҳақиқий оғир инфекцияга чалинганингизда ҳеч қайси антибиотик таъсир қилмай қолади ва натижада оддий йирингли яра ҳам ўлимга олиб келиши мумкин.

Ичакдаги барча фойдали бактериялар ўлиб, оғир дисбактериоз, сурункали ич кетиши ва иммунитетнинг кескин тушиши кузатилади. Токсик гепатит юзага келиб, жигар ва буйракларга ҳаддан ташқари оғир юклама тушиб, уларнинг ҳужайралари заҳарланади.

Гормонал препаратлар (масалан, дексаметазон, преднизолон, контрацептивлар) эса инсон эндокрин тизимига тўғридан-тўғри аралашади. Уларни ҳам шифокор назоратисиз ичиш ёки кескин тўхтатиш оғир оқибатларга олиб келиши мумкин.

Буйрак усти бези атрофияси — организм тайёр гормон келаётгани сабабли ўзининг шахсий гормонларини ишлаб чиқаришни тўхтатади. Дорини тошқари тўхтатганда бемор шок ҳолатига тушиши мумкин.

Агар ушбу дори воситалари бир вақтнинг ўзида шифокор назоратисиз ичилса, улар бир-бирининг таъсирини ўзгартириб юборади. Масалан, моунжаро ошқозон сўрилишини секинлаштиргани сабабли антибиотик мутлоқ таъсир қилмай қолиши ёки гормонлар ошқозон ярасини келтириб чиқариб, моунжаро таъсирида бу яра қонашга олиб келиши мумкин.

Ҳар қандай дори қабул қилишдан аввал мутахассис билан маслаҳатлашинг. Ўз вақтида қилинган шифокор кўриги сизни умрбод ногирон бўлиб қолишдан ёки ҳаётий хавфлардан ҳимоя қилади.