Ўзбекистоннинг Фижидаги элчиси (қароргоҳи Токио шаҳрида жойлашган) этиб тайинланган Муҳсинхўжа Абдураҳмонов ушбу мамлакат Президенти Рату Найкама Тавакеколати Лалабалавуга ишонч ёрлиқларини топширди.

«Дунё» АА хабарига кўра, шу муносабат билан тантанали маросим ташкил қилинган ва Элчи шарафига Ўзбекистон давлат мадҳияси янграб, мамлакат байроғи кўтарилган.

Расмий тадбирлардан сўнг бўлиб ўтган суҳбат давомида президент Найкама Лалабалаву икки мамлакат географик жиҳатдан узоқда жойлашган бўлсада, уларни ўзаро ҳурмат, конструктив мулоқот ва умумий қадриятларга асосланган дўстона алоқалар боғлаб туришини таъкидлади.

Фижи етакчиси, шунингдек, Ўзбекистон муҳим стратегик минтақада жойлашгани, бой табиий ресурслари ҳамда юқори салоҳиятли инсон капитали мавжудлигини эътироф этиш баробарида, сўнгги йилларда Ўзбекистон Президенти томонидан минтақада тинчлик ва барқарор ривожланишни таъминлаш бўйича олиб борилаётган конструктив ва проактив ташқи сиёсатни юксак баҳолади.

Шу билан бирга, икки мамлакат ўртасидаги дипломатик алоқалар тарихида илк маротаба Ўзбекистоннинг Фижидаги элчисининг тайинланиши Фижи томони учун ҳам муҳим тарихий воқеага айлангани қайд этилди. Шу муносабат билан Фижи билан икки ва кўп томонлама алоқаларни ривожлантиришга эътибор қаратгани учун Ўзбекистон Президентига алоҳида миннатдорлик билдирилди.

Учрашув якунида Фижи Президенти Ўзбекистон Президентига чуқур ҳурмат ва самимий саломларини йўллади ҳамда ўзбек халқига тинчлик ва фаровонлик тилади.

Ўзбекистон ва Фижи ўртасида дипломатик муносабатлар 2010 йил 16 июнь куни ўрнатилган.

Эслатиб ўтамиз, Мухсинхўжа Абдураҳмонов 2021 йил 27 сентябрь куни Япония Императори Нарухитога Ўзбекистон элчиси сифатидаги ишонч ёрлиқларини топширган эди.