Бугун, 4 апрель куни Миллий олимпия қўмитасида Ўзбекистон гимнастика федерациясининг навбатдан ташқари ҳисобот-сайлов конференцияси бўлиб ўтди. Бу ҳақда МОҚ ахборот хизмати хабар берди.

Унда Миллий олимпия қўмитаси президенти Умид Аҳмаджонов, Жисмоний тарбия ва спорт ишлари вазири Шоакрам Исроилов, Миллий олимпия қўмитаси бош котиби Жасур Матчанов, шунингдек, Ўзбекистон гимнастика федерацияси мутасадди ходимлари иштирок этишди.

Конференцияни Ўзбекистон гимнастика федерациясининг биринчи вице-президенти Руслан Мустаев очиб берди ва кун тартиби билан таништирди. Унга кўра, асосий масала Ўзбекистон гимнастика федерациясига янги президент сайлаб олиш эди. Бунгача «Ёшлар иттифоқи спорт маркази» маъсулияти чекланган жамият директори лавозимда фаолият олиб борган мутахассис, Ўзбекистон Республикасида хизмат кўрсатган спорт устози Абдуллаева Заррина Аъзамовна Ўзбекистон гимнастика федерацияси президенти лавозимига кўпчилик овоз билан сайланди.

Конференция давомида шунингдек, Ўзбекистон гимнастика федерациясининг биринчи вице-президенти сифатида ишлаб келган Руслан Мустаев ва федерация бош котиби сифатида фаолият кўрсатган Гёзелла Филлипова ўз лавозимларидан истеъфога чиқишди. Энди федерациянинг янги раҳбари уларнинг ўрнига муносиб мутахассислар номзодини кўриб чиқиши лозим бўлади.

Эслатиб ўтамиз, Ўзбекистон Республикаси Биринчи Президенти Ислом Каримовнинг кичик қизи Лола Каримова-Тиллаева Ўзбекистон гимнастика федерацияси президенти лавозимидан кетган эди.