Пенсилваниядаги Вилланова университети олимлари ўтказган тадқиқотга кўра, ўқувчилар сунъий интеллект яратган қисқа ҳикояларни одамлар ёзган асарларга нисбатан юқорироқ баҳолашди. Тадқиқот натижалари Judgment and Decision Making журналида эълон қилинди.

Тадқиқотнинг биринчи босқичида 1 682 нафар катта ёшли кишига олтита қисқа ҳикоядан бири ўқиш учун таклиф этилди. Матнларнинг ярми инсонлар, қолган ярми эса ChatGPT томонидан ёзилган. Иштирокчиларга эса, гарчи бу ҳақиқатга тўғри келмаса-да, асарларни муаллифлар ёзгани маълум қилинди. Ҳикояларни ўқиб бўлгач, иштирокчилар уларни қизиқарлилиги, сифати ва ўқувчини ўзига жалб қилиш даражаси бўйича баҳолашди.

Маълум бўлишича, сунъий интеллект ёзган матнлар барча кўрсаткичлар бўйича юқорироқ баҳо олди. Шунинг баробарида, иштирокчилар ўзлари инсон томонидан ёзилган деб ҳисоблаган асарларни, уларнинг ҳақиқий муаллифи ким бўлишидан қатъи назар, юқорироқ баҳолашди.

Тадқиқотнинг асосий муаллифларидан бири, доктор ва ёзувчи Дина Сколник Вайсберг таъкидлашича, ушбу натижалар адабий ижодни тўлиқ машиналарга топшириш кераклигини англатмайди. У сунъий интеллект яратган романлар ҳамда технологиялар билан ҳаммуаллифликда ёзилган асарлар бир вақтнинг ўзида мавжуд бўлиши мумкинлигини истисно этмаган ҳолда, инсон ижодий жараёнининг қадрини пасайтирмасликка чақирди. Унинг фикрича, одамлар ўзини ифода этиш, ҳаётий тажрибасини англаш ва турли синовларни енгиб ўтиш учун ҳам ёзади.

905 нафар катта ёшли иштирокчи жалб этилган қўшимча тадқиқот эса ўқувчилар инсон томонидан ёзилган матнларни сунъий интеллект яратган матнлардан аниқ ишонч билан ажрата олмаслигини кўрсатди. Биринчи тажрибада иштирокчиларнинг атиги 40 фоизи матн муаллифини тўғри аниқлади. Бу ҳатто тасодифий танлов орқали эришилиши мумкин бўлган натижадан ҳам паст кўрсаткич. Иккинчи тажрибада эса тўғри жавоблар улуши 52 фоизни ташкил этган.

Тадқиқот муаллифлари одамлар матн муаллифини ишончли аниқлай олишини тасдиқлайдиган етарли далиллар мавжуд эмас, деган хулосага келишди. Қайд этилишича, сунъий интеллект билан ишлаш тажрибаси муаллифни тўғри аниқлаш эҳтимолини оширган, китобхонлик даражаси эса натижага сезиларли таъсир кўрсатмаган.

Доктор Вайсбергнинг тахминига кўра, ўқувчиларнинг «инсон ёзган» ҳикояларга мойиллиги уларнинг ҳаққонийликка интилиши билан боғлиқ. Бироқ амалда иштирокчилар ўқиш ва қабул қилиш осонроқ бўлгани учун кўпинча сунъий интеллект яратган матнларни танлаган.