Xiaomi kompaniyasi Xitoyda o‘zining yangi flagman smartfonlari Xiaomi 18 Pro va Xiaomi 18 Pro Maxni namoyish qildi. Yangi modellarda kompaniya orqa displeyni saqlab qolgan, ammo kamera, protsessor, akkumulyator va ekran maxfiyligi borasida bir qator muhim yangiliklarni taqdim etgan.

Yangi smartfonlarning eng ajoyib xususiyatlaridan biri ekrandagi ma’lumotlarni yon-atrofdagilardan yashirishga mo‘ljallangan Privacy Display texnologiyasidir. U dasturiy filtr emas, balki ekranning apparat darajasida ishlaydi. Ya’ni smartfonga yon tomondan qaragan odam ekrandagi ma’lumotlarni ko‘rishi ancha qiyinlashadi. Bu funksiya ayniqsa jamoat joylari, transport yoki ish muhitida shaxsiy ma’lumotlardan foydalanganda qo‘l kelishi mumkin.

Smartfonlarning orqa qismidagi qo‘shimcha ekran ham saqlanib qolgan. Xiaomi 18 Proda 2,7 dyuymli, Pro Maxda esa 2,9 dyuymli OLED displey o‘rnatilgan. U orqali bildirishnomalarni ko‘rish, ayrim funksiyalarni boshqarish va hatto asosiy kamera yordamida selfi suratga olish mumkin.

Kamera imkoniyatlari ham flagmanlarning asosiy ustunliklaridan biridir. Leica bilan hamkorlikda ishlab chiqilgan kamera tizimida 200 megapikselli asosiy kamera, 200 megapikselli telefoto kamera va 50 megapikselli keng burchakli kamera joylashgan. Telefoto kamera esa 3,2 karra optik yaqinlashtirishni qo‘llab-quvvatlaydi.

Ishlash tezligi bo‘yicha Xiaomi 18 Pro Qualcommning 2 nanometrli Snapdragon 8 Elite Gen 6 protsessori bilan jihozlangan. Pro Max versiyasida esa Snapdragon 8 Elite Extreme Gen 6ning kuchliroq versiyasi qo‘llanilgan. Ikkala smartfon ham 16 GB gacha operativ xotira va 1 TB gacha ichki xotiraga ega. Akkumulyator sig‘imi ham ancha katta, Xiaomi 18 Pro 7000 mA·soatlik, 18 Pro Max esa 8500 mA·soatlik batareyaga ega. Ikki model ham 100 vattlik simli tez quvvatlashni qo‘llab-quvvatlaydi.

Narxlarga kelsak, Xitoy bozorida Xiaomi 18 Proning 12 GB operativ va 256 GB ichki xotiraga ega versiyasi 5999 yuandan boshlanadi. Bu taxminan 900 dollarga teng. Pro Maxning xuddi shu konfiguratsiyasi 6999 yuandan, ya’ni, taxminan 1045 dollardan boshlanadi. Bu dollardagi qiymatlar faqat konvertatsiya bo‘lib, xalqaro bozordagi rasmiy narx hisoblanmaydi.

Kompaniya Xiaomi 18 Pro va Pro Maxni avval Xitoy bozorida taqdim etdi. Xiaomi ushbu seriyaning xalqaro bozorda ham chiqarilishini ma’lum qilgan. Oddiy Xiaomi 18 modeli esa hozircha taqdim etilmagan.