«India Times» gazetasi 2030-yilga borib suvga g‘arq bo‘lish xavfi ostidagi shaharlar ro‘yxatini tuzdi. Hind jurnalistlari buning uchun iqlim o‘zgarishlarini o‘rganuvchi Climate Central tashkiloti xaritasi ma’lumotlaridan foydalanishdi.

Birinchi nishon — Amsterdam. Niderlandiya poytaxti jahondagi eng go‘zal shaharlardan: albatta, ko‘priklari ham bisyor, ammo ular kerak bo‘lmay qolishi mumkin — shahar butunlay suvga cho‘kish xavfi ostida. Iqlim isishi dunyo okeani sathining sezilarli ko‘tarilishiga olib keladiki, hatto toshqinlarga qarshi kurashib toblangan gollandlarga-da oson kechmaydi.

Ro‘yxatdagi ikkinchi shahar — Basra (Iroq). Shahar Shatt al-Arab daryosining Fors ko‘rfaziga quyilishiga yaqin qismida joylashgan. Basraning tevarak-atrofida botqoqliklar mo‘l, yana o‘n yil ichida shahar qisman yoki butunlay suvga g‘arq bo‘lishi mumkin.

Nashr yozishicha, iqlim o‘zgarishlari global miqyosdagi tabiiy ofatlarni keltirib chiqaradi. 2030-yillarga borib suv toshqinlari, shuningdek, Yangi Orlean (AQSh), Adriatika dengizidagi 118 orolda joylashgan Venetsiya (Italiya), Osiyodagi millionlab aholi yashovchi Hoshimin (Vetnam) va Kalkutta (Hindiston) singari shaharlar taqdirini savol ostida qoldiradi.