Испаниянинг Толедо провинциясида иккита тезюрар поезднинг тўқнашуви оқибатида ҳалок бўлганлар сони 68 кишига етди, 179 дан ортиқ одам жароҳат олди, деб хабар беради El Español Фуқаролик ҳимояси хизмати (Испания Ички ишлар вазирлиги таркибидаги хизмат) маълумотларига асосланиб.

Бош вазир Педро Санчес Испанияда 29 октябрдан 31 октябргача уч кунлик мотам эълон қилди.

28 октябрь куни эрталаб Мадрид ва Севилья ўртасида ҳаракатланаётган Renfe AVE ва Iryo тезюрар поездлари тўқнашди, натижада иккита вагон рельсдан чиқиб кетди. Икки поездда 544 киши бўлган: Renfe'да 147 ва Iryo'да 397 киши.

Дастлабки маълумотларга кўра, фожиа инсон хатоси туфайли содир бўлган. Испания транспорт вазири Оскар Пуэнтенинг сўзларига кўра, фалокатдан олдин автоматик поездларни бошқариш тизимининг (LZB) ишламай қолишига олиб келган носозлик бўлган.

Жараёнлар темир йўл операторининг диспетчери томонидан бошқарилган. Носозликдан бир неча дақиқа ўтгач, у Renfe'га йўлни давом эттиришга рухсат берди, аммо у рельсларда тўхтаб турган Iryo билан тўқнашди.

ОАВ хабар беришича, иккинчи поезд нима учун ҳаракатланмагани номаълум.

Бу Испанияда сўнгги 13 йил ичидаги энг катта темир йўл фалокати бўлди. 2013 йилда мамлакатнинг шимоли-ғарбидаги Сантьяго-де-Компостела чеккасида тезюрар поезд рельсдан чиқиб кетиши натижасида 80 киши ҳалок бўлганди.

Бу мамлакатда жорий йил бошидан бери содир бўлган учинчи поезд ҳалокати. Январь ойида Кордова провинциясида поезд тўқнашувида 46 киши ҳалок бўлди, бир неча кундан кейин эса Каталонияда яна бир поезд рельсдан чиқиб кетди.