Россия президентининг матбуот котиби Дмитрий Песков Украинага қарши олиб борилаётган “махсус ҳарбий амалиёт”ни илк бор уруш деб атади. Таҳлилчилар Кремлга ушбу ҳақиқатни тан олиш учун 4,5 йил керак бўлганини ёзмоқда.

“Ҳа, уруш, чинакам уруш кетмоқда. Нега уруш биласизми? Бари махсус ҳарбий амалиёт шаклида бошланган эди. Уруш тарзида давом этмоқда. Чунки Киевнинг ортида Берлин, Париж, Ҳаага, Осло ва, афсуски, Вашингтон турибди”, – деган Д.Песков “Вести” дастурига берган интервьюсида.

Кремл воизига кўра, Ғарб давлатлари Украинага Россия нишонларига зарба беришда кўмак бермоқда, бунинг учун сунъий йўлдош инфратузилмаси ҳам сафарбар этилмоқда. Песков ҳозирги шароитда Украина ҳукумати “ҳамма нарсага тайёр” эканини ҳам таъкидлаган. 

Россия қуролли кучлари 2022 йил 24 февраль куни Украина ҳудудига бостириб кириб кенг кўламли уруш бошлагани маълум. Аммо президент Владимир Путиндан тортиб Москванинг катта-кичик мулозимларигача Украинадаги урушни ўз номи билан атамай, “махсус ҳарбий амалиёт” деган иборани қўллаб келаётганди.

Ўтган тўрт йилдан ошиқ вақт мобайнида Украинадаги хунрезликни уруш деб атагани сабаб юзлаб киши жаримага тортилган.

Россиялик сиёсатшунос Аркадий Дубнов Россия раҳбарияти махсус ҳарбий амалиётни уруш дея тан олишига 4,5 йил зарур бўлганига эътибор қаратган.

Ўзбекистонлик сиёсатшунос Отабек Акромов Кремлнинг сиёсий риторикаси ўзгариши сабабини очиқлаган.

“Менимча, бу Кремль учун янги фрейм яратишга уринишдир. Чунки “Украинага қарши махсус операция” билан “бутун Ғарбга қарши уруш” ўртасида катта сиёсий ва психологик фарқ бор. Агар операция қисқа муддатли мақсадларга эриша олмаган бўлса, уни “Ғарбга қарши уруш” сифатида қайта талқин қилиш муваффақиятсизликни нисбатан юмшатиш, жамиятни узоқ давом этадиган қарама-қаршиликка тайёрлаш ва қурбонликларни оқлаш учун қулайроқ риторик асос яратади”, – деб ёзади О.Акромов.

2022 йил февраль ойидан буён фаол равишда уруш олиб бораётган Россия ҳозирча сулҳ таклифларига рўйхушлик бермаётир.

Аввал хабар берганимиздек, 6 июлга ўтар кечаси ҳам Россия Украина пойтахти Киевга ракета ва дронлар билан оммавий ҳужум уюштирди. Сўнгги маълумотларга кўра, ҳужум оқибатида камида 10 киши ҳалок бўлган, 46 нафар инсон жароҳатланган. Улар орасида беш нафар бола ҳам бор.

Сўнгги кунларда Европа махсус хизматлари Украинага қарши урушда муваффақиятга эриша олмаётган Россия Федерацияси НАТО давлатларига нисбатан провокацион ҳаракат содир этиб, вазиятни издан чиқариши мумкинлигидан огоҳлантирмоқда.