Непалда қутқарувчилар вайронкор сув тошқинидан ўн кун ўтиб икки кишини — уй вайроналари остидан бир аёлни ва гидроэлектр станцияси (ГЭС) туннелидан Хитой фуқаросини тирик топишди.

Тахминан 60 ёшлардаги аёл Катманду яқинидаги Нувакот туманида вайроналар остидан аниқланди. У вертолётда шифохонага етказилди.

Деярли бир вақтнинг ўзида Непал ҳарбийлари ва Жанубий Корея қутқарувчиларидан иборат қўшма гуруҳ «Upper Trishuli» ГЭС туннел тизимидан хитойлик эркакни топишди. Мутахассислар туннел ичкарисига қараб қарийб 225 метр масофани босиб ўтишларига тўғри келди. Жабрланувчига биринчи ёрдам кўрсатилди ва у ҳам вертолётда эвакуация қилинди.

Бундан бир кун аввал Тришули ГЭС туннелидан икки нафар непаллик ишчи қутқарилган эди. Шу тариқа, икки кун ичида тўрт кишини тирик топишга муваффақ бўлинди. Расмийлар бошқа туннелларда ҳам омон қолганлар бўлиши мумкинлигидан умид қилмоқда: айни пайтда 12 та гидроэнергетика объектининг 900 га яқин ишчиси бедарак йўқолган деб ҳисобланмоқда, улардан 500 га яқини ер остида бўлиши мумкин.

Сув тошқини Непал ва унга қўшни Тибетга 26 август куни ёпирилган эди. Тахминларга кўра, бунга музликнинг кўчиши сабаб бўлган. Шу пайтгача Непалда 1 344 кишининг ҳалок бўлгани расман тасдиқланди, 4 900 га яқин киши эса бедарак йўқолган деб ҳисобланмоқда. Тибетда 31 киши ҳалок бўлгани ва 531 киши бедарак йўқолгани ҳақида хабар берилган.