Шри-Ланканинг собиқ биринчи хоними Ширанти Ражапакса Коломбодаги болалар шифохонаси учун тиббий сканер сотиб олиш учун йиғилган хайрия маблағларидан нотўғри фойдаланиш эҳтимоли билан боғлиқ ҳолда ҳибсга олинди. Бу ҳақда BBC News мамлакатнинг коррупцияга қарши кураш органларига таяниб хабар берди. 

​Собиқ президент Маҳинда Ражапаксанинг 73 ёшли рафиқаси чоршанба куни Коломбодаги уйида ҳибсга олинди. Терговчилар Сирилия Савия хайрия ташкилоти томонидан йиғилган 10 миллион Шри-Ланка рупияси (тахминан 30300 доллар) тақдирини текширмоқда.

​Маблағлар Коломбодаги Lady Ridgeway болалар касалхонаси учун ихтисослаштирилган сканер сотиб олиш учун мўлжалланган эди. Бироқ, расмийларга кўра, шунга ўхшаш қурилма илгари шифохонага Хитой ҳукумати томонидан хайрия қилинган эди.

​Ражапакса ҳар қандай қонунбузарликни рад этади ва маблағлар ўзлаштирилмаганини таъкидлайди. Унинг эрининг вакили Манжой Гамаге ҳам маблағлар Сирилия Савиянинг ҳисобларида эканини ва ҳеч қандай фирибгарлик содир этилмаганини айтди.

​Собиқ биринчи хоним душанба куни даволаниш жараёнида бўлган Сингапурдан Шри-Ланкага қайтиб келди. Қайтиб келишдан олдин у ҳибсга олинишининг олдини олиш учун судга ариза берди, иш 12 октябрга белгиланган.

​Маҳинда Ражапакса 2005 йилдан 2015 йилгача Шри-Ланка президенти бўлиб ишлаган ва кўп йиллар давомида мамлакат сиёсатидаги энг нуфузли шахслардан бири бўлиб қолган. 2009 йилда ҳукумат кучлари Тамил Илам исёнчиларини мағлуб этиб, қарийб 30 йиллик фуқаролар урушига чек қўйганидан сўнг, кўплаб аҳоли уни қаҳрамон деб ҳисоблашган.

​2022 йилда Шри-Ланкада инфляциянинг ошиши ва ёқилғи, озиқ-овқат ва дори-дармонлар танқислиги фонида оммавий норозилик намойишлари бўлиб ўтди. Бу Маҳинданинг ўша пайтда президент бўлган укаси Готабая Ражапаксанинг лавозимидан четлатилишига олиб келди.

​Президент Анура Кумара Диссанаяке ҳокимият тепасига келганидан сўнг, расмийлар Ражапакса оиласи аъзолари иштирокидаги коррупция ишлари бўйича терговни қайта бошладилар.