Тошкент халқаро инвестиция форуми доирасида Президент Шавкат Мирзиёев Хитой Халқ Республикаси Миллий энергетика бошқармаси раҳбари Ван Хунчжи бошчилигидаги делегацияни қабул қилди. Учрашувда Хитойнинг етакчи энергетика, саноат ва молия ташкилотлари раҳбарлари иштирок этди.

Музокаралар марказида энергетика ва геология соҳаларида юқори технологияли лойиҳаларни амалга ошириш, шунингдек, банк-молия соҳасидаги ҳамкорликни кенгайтириш масалалари турди. Давлат раҳбари Ўзбекистон ва Хитой ўртасидаги муносабатлар савдо-иқтисодий ва инвестиция соҳаларида жадал ривожланаётганини қайд этди.

Маълум қилинишича, жорий йилнинг ўтган қисмида икки давлат ўртасидаги товар айирбошлаш ҳажми 6 миллиард доллардан ошган. Шунингдек, Хитойдан мамлакат иқтисодиётига 8 миллиард доллардан зиёд тўғридан-тўғри инвестициялар жалб қилинган. Бугунги кунда Ўзбекистонда қарийб 6 мингта қўшма корхона фаолият юритмоқда.

Учрашувда «яшил» энергетика соҳасидаги ҳамкорлик алоҳида муҳокама қилинди. Ҳозирда Хитой компаниялари иштирокида Ўзбекистонда қуёш ва шамол электр станциялари ҳамда энергия сақлаш тизимлари барпо этилмоқда.

Томонлар фотоэлектр станциялар қувватини кенгайтириш, агровольтаика технологияларини жорий этиш ва янги электр узатиш линияларини қуришга қаратилган ташаббусларни қўллаб-қувватлади.

Шунингдек, чиқиндиларни қайта ишлаш орқали энергия ишлаб чиқариш, дата-марказлар ташкил этиш ва бошқа замонавий технологик ечимларни ривожлантириш имкониятлари ҳам кўриб чиқилди.

Музокараларда тоғ-кон ва геология соҳасидаги ҳамкорлик истиқболлари ҳам муҳокама қилинди. Бу йўналишда конларда қўшма геология-қидирув ишларини олиб бориш, уларни ўзлаштириш ва муҳим хомашё ресурсларини етказиб бериш бўйича узоқ муддатли шерикликни йўлга қўйиш режалаштирилмоқда.

Хитойнинг йирик банклари билан ҳамкорликни кенгайтириш масаласига ҳам устувор аҳамият қаратилди. Томонлар инфратузилма лойиҳаларини молиялаштириш, ирригация тизимларини модернизация қилиш, юқори тезликдаги автомобиль йўллари ва гидроэлектростанциялар қуриш, қишлоқ хўжалиги техникасини етказиб бериш ҳамда кичик ва ўрта бизнесни қўллаб-қувватлаш масалаларини муҳокама қилди.

Учрашув якунида Хитой делегацияси вакиллари эришилган келишувларни амалга оширишга қатъий интилишини билдирди.