Президент админстрацияси ҳузуридаги Ахборот ва оммавий коммуникациялар агентлигида «Турғун органик ифлослантирувчи моддалар ҳақида»ги Стокгольм конвенциясини ратификация қилиш тўғрисида»ги Ўзбекистон Республикаси Қонунининг қабул қилиниши, бу борада олиб борилаётган ишлар юзасидан ОАВ ходимлари учун брифинг ташкил этилди.

Унда Қонунчилик палатаси депутатлари, экология ва атроф муҳитни муҳофаза қилиш давлат қўмитаси мутасаддилари иштирок этди.

Қайд этилдики, кейинги йилларда мамлакатимизда экология ва атроф-муҳитни муҳофаза қилиш, аҳоли саломатлиги учун мақбул шароитлар яратиш ва экологик мувозанатни сақлашга йўналтирилган бир қатор тизимли ислоҳотлар олиб борилмоқда.

Жорий йилнинг 5 май куни «Турғун органик ифлослантирувчи моддалар ҳақида»ги Стокгольм конвенциясини ратификация қилиш тўғрисида»ги Ўзбекистон Республикасининг Қонунининг қабул қилиниши давлатнинг келажак авлод учун атроф табиий муҳитни муҳофаза қилиш, уни борлигича сақлашга қаратилаётган эътиборнинг яққол далилидир.

Ҳозирги кунда 182 мамлакат мазкур конвенция иштирокчиси ҳисобланади. Етакчи давлатлардан АҚШ, Италия ва Исроил конвенцияни имзолаган бўлса-да, ратификация қилмаган.

Бугунги кунга келиб «Турғун органик ифлослантирувчи моддалар ҳақида»ги Стокгольм конвенциясини рўйхатини кенгайтиришга йўналтирилган 3та тузатма киритилган. Бу эса назорат қилинадиган ифлослантирирувчи моддаларнинг кўпайишига олиб келади. Бунда ҳар бир тузатма Конвенциянинг бир қисми сифатида, агарда Конвенция томонларининг қўшимча шартлари ва баёнотлари йўқ бўлган тақдирда бажарилиши мажбурий ҳисобланади.

Ушбу Қонун кучга киргандан кейинги икки йил мобайнида турғун органик ифлослантирувчи моддаларни тақиқлаш, чеклаш, шунингдек, экологик ҳавфсиз усулда йўқ қилиш борасида Миллий ҳаракатлар режаси ишлаб чиқиш кўзда тутилган.

Конвенцияга қўшилиш қўйидаги имкониятларни яратади:

турғун органик ифлослантирувчилар билан боғлиқ экологик ҳолатни яхшилаш, аҳоли, атроф-муҳит, ўсимлик ва ҳайвонот учун юзага келиши мумкин бўлган салбий оқибатларни бартараф этиш;
конвенция доирасида юклатилган мажбуриятларни бажариш учун ривожланаётган ҳамда иқтисодиёти ўтиш даврида бўлган кўмак дорасида турғун органик ифлослантирувчиларни экологик хавфсиз йўқ қилиш бўйича молиявий ресурслар ва технологияларга эга бўлиш;
Ўзбекистон Республикасининг Европа иттифоқи имтиёзлари Бош тизимига қўшилиши ҳисобига миллий маҳсулотларни экспорт қилиш географияси ва ҳажмини кенгайтириш.

Эътиборлиси шундаки, ушбу конвенцияга қўшилиш юртимиз кимё саноати ва қишлоқ ҳўжалигининг ривожига мутлоқо салбий таъсир кўрсатмайди. Чунки унинг таъсир даражаси Ўзбекистон Республикаси ҳудудида фойдаланмайдиган моддаларга нисбатан татбиқ этилади.

Тадбирда Миллий ҳаракатлар режаси ишлаб чиқиш ва уни амалга ошириш билан боғлиқ саволларга атрофлича жавоб берилди.