«Universal Mobile Systems» МЧЖ (MobiUz) устав капиталидаги давлат улушини хусусийлаштириш бўйича халқаро очиқ савдо жараёнлари муваффақиятли якунланди.

Давлат активлари агентлиги маълум қилишича, MobiUz компаниясининг 100 фоиз давлат улушини сотиш жараёни халқаро стандартлар асосида ташкил этилган. Унда стратегик консультант сифатида «Rothschild & Co», молиявий консультант сифатида «KPMG», мустақил баҳоловчи сифатида эса «Deloitte» жалб қилинган.

Хусусийлаштириш жараёни халқаро миқёсда кенг тарғиб қилиниб, 100 дан ортиқ стратегик ва молиявий инвесторлар билан музокаралар ўтказилган. Шунингдек, лойиҳа «Bloomberg» ва «Financial Times» каби нуфузли халқаро нашрларда ёритилган.

Натижада АҚШ, Япония, Форс кўрфази мамлакатлари, Европа ва Кавказорти минтақаларидан 15 дан зиёд инвестор қизиқиш билдирган. Улардан 10 нафари дастлабки таклифларни тақдим этган бўлса, якуний босқичга 6 нафар иштирокчи етган.

Савдо натижаларига кўра, АҚШнинг «McKim and Company» компанияси бошчилигидаги молиявий инвесторлар ва технологик ҳамкор «JVR Enterprises LLC» («JVR Capital Group») иштирокидаги консорциум ғолиб деб топилди.

Ғолиб таклифга мувофиқ, MobiUz компанияси 351 миллион АҚШ долларига баҳоланган. Шунингдек, янги инвесторлар телекоммуникация инфратузилмасини ривожлантириш учун қўшимча 500 миллион долларгача инвестиция киритишни режалаштирмоқда.

Давлат активлари агентлиги маълумотига кўра, битимнинг EV/EBITDA мультипликатори 7,4 баробарни ташкил этган бўлиб, бу компания бозорда рақобатбардош нархда баҳоланганини кўрсатади.

Битимнинг тўлиқ якунланиши учун тегишли давлат органлари рухсатномаларини олиш ва барча корпоратив-ҳуқуқий тартиб-таомилларни бажариш талаб этилади.

MobiUz Ўзбекистоннинг йирик мобил алоқа операторларидан бири ҳисобланади. Унинг хусусийлаштирилиши давлат активларини ислоҳ қилиш ва телекоммуникация соҳасига хусусий капитални жалб этиш бўйича олиб борилаётган сиёсатнинг муҳим босқичларидан бири сифатида баҳоланмоқда.