Kecha, 2-yanvar kuni maktab va kollej o‘quvchilarining hujjatlarsiz mashinani ko‘chaga haydab chiqishi oqibatida ikki noxush hodisa sodir bo‘ldi. Biri — Qibrayda, ikkinchisi — Samarqandda.

Toshkent viloyatining Qibray tumanidagi Agrotadbirkor kasb-hunar kolleji o‘quvchisi Sh.A. 2 yanvar kuni «Spark» mashinasini tegishli hujjatlarsiz ko‘chaga haydab chiqqan.

Natijada Ulug‘-yo‘l ko‘chasida piyoda ketayotgan viloyat ichki ishlar xodimini urib yuborgan. Xodim «bosh miya ochiq jarohati va 2-3-darajali koma holati» tashxisi bilan shifoxonaga yotqizilgan.

Shuningdek, Samarqand shahrida 2 yanvar kuni Samarqand tumanida yashovchi 35-sonli o‘rta maktabning 14 yoshli 9-sinf o‘quvchisi D.X. hujjatlarsiz bobosi nomidagi «Lasetti» rusumli avtomashinani Zarafshon shox ko‘chasida haydab ketayotib, qarama-qarshi yo‘nalishga chiqib ketishi oqibatida, qarshisidan harakatlanib kelayotgan «Matiz» rusumli avtomashina bilan to‘qnashuv sodir etgan.

Natijada «Matiz» avtomashinasi haydovchisining 3 yoshli o‘g‘li jarohat olib voqea joyida vafot etgan va haydovchi hamda uning turmush o‘rtog‘i va 1 yoshli qizi jarohat olib kasalxonaga yotqizilganlar.

IIV Jamoatchilik va ommaviy axborot vositalari bilan aloqalar boshqarmasi xabar berishicha, har ikkala holat yuzasidan jinoyat ishi qo‘zg‘atilib, tergov harakatlari olib borilmoqda.