Milandagi «San Siro» stadionida 2026-yilgi qishki Olimpiya o‘yinlari tantanali ravishda ochildi.

Qishki olimpiadaning bosh mavzusi — «Armoni» (italyanchadan tarjimasi — «Uyg‘unlik»). Sahnalashtirilgan tomoshalarda italyan va Olimpiada an’analari va tarixi aks ettirildi. Italiya o‘z tarixida to‘rtinchi Olimpiadaga mezbonlik qilmoqda. Oxirgi marta Italiyaning Turin shahri 2006-yilda Qishki o‘yinlarni o‘tkazgan.

Kechaga taklif etilgan bosh yulduz amerikalik qo‘shiqchi Merrayya Kerri bo‘ldi. U italyan tilida Volare hamda o‘zining Nothing Is Impossible qo‘shiqlarini ijro etdi.

Olimpiya o‘yinlarida sportchilar ilk marotaba bir vaqtning o‘zida to‘rtta joyda saf tortib o‘tishdi — turnir geografiyasi tufayli hamma atletlar Milanda ishtirok eta olmadi. Eslatib o‘tamiz, Olimpiada Italiya shimolidagi oltita shaharda bo‘lib o‘tadi.

Italiyadagi 2026-yilgi Olimpiya va Paralimpiya o‘yinlarining timsoli — Tina va Milo laqabli oqsuvsarlar. Ularning nomlari Kortina-d’Ampetsso va Milan shaharlariga ishoradir.

Tomoshabinlar Italiya musiqasi klassiklari — Rossini, Puchchini va Verdi bilan tanishtirildi.

Modeler Jorjio Armani xotirasiga bag‘ishlangan modalar namoyishi bo‘lib o‘tdi (U 2025-yil sentyabrida vafot etgan). Yashil, oq va qizil ranglardagi modellarning uchta guruhi Italiya bayrog‘ini ifodalovchi harakatlanuvchi kompozitsiyada saf tortdi.

Qishki o‘yinlar tashkiliy qo‘mitasi prezidenti Javani Malado o‘z nutqida dunyoni tinchlikka chorladi: «Jahonning katta qismi nizolar bilan bo‘lingan bir paytda, sizning ishtirokingizning o‘zi boshqa dunyo mumkinligini ko‘rsatadi. Va bu birdamlik, hurmat va hamjihatlik dunyosidir». U so‘zini «Hech qachon italiyalik ekanligimdan bugungidek faxrlanmaganman», deya yakunladi.

Xalqaro olimpiya qo‘mitasi prezidenti Kirsti Koventri o‘zi uchun ilk Olimpiadani ochib berdi: «Men tug‘ilgan Afrikada «Ubuntu» degan so‘z bor. U «Men borman, chunki biz bormiz» degan ma’noni anglatadi. Bir-birimizga yordamlashib ko‘tarilyapmiz. Bizning kuchimiz bir-birimizga g‘amxo‘rlik qilishdan kelib chiqadi».

Koventrining chiqishidan so‘ng Italiya prezidenti Serjo Mattarella o‘yinlarga rasmiy start berdi. U minbarlarda o‘tirgan kam sonli birinchi shaxslardan biri bo‘ldi. Xususan, AQSh terma jamoasini Donald Tramp emas, vitse-prezident Jey Di Vens olqishladi. Keyingi qishki Olimpiada mezboni — Fransiya prezidenti Emmanuel Makron ham marosimga kelmadi (xabarlarga ko‘ra, aynan Jey Di Vens bilan uchrashmaslik uchun shunday qilgan — tahr.).

Rasmiylardan so‘ng Italiya va jahon operasi yulduzi Andrea Bochellining kompozitsiyasi ostida Olimpiya mash’alasi estafetasi yakunlandi: Italiya futboli afsonalari Franko Barezzi va Juzeppe Bergomi mash’alani Italiya terma jamoasi voleybolchi qizlariga, ular esa terma jamoa voleybolchi yigitlariga topshirdilar.

Marosim yakunida Gollivud aktrisasi Sharliz Teron sahnaga ko‘tarildi. U Janubiy Afrika Respublikasi fuqarosi sifatida Nelson Mandelaning nutqini o‘qib berdi va yana bir bor dunyoda tinchlik masalasini tilga oldi.