Joriy yilning 10-dekabr kuni Jizzax viloyati, Do‘stlik tumanidagi «Manas» mahalla fuqarolar yig‘ini hududida joylashgan «O‘zbekiston pochtasi» AJning Jizzax filialiga qarashli «Manas» pochta aloqasi bog‘lamasining rekonstruksiya qilingan yangi binosi tantanali ravishda ochildi.

Mazkur binoda bir vaqtning o‘zida «Manas» va «Navro‘z» mahalla fuqarolar yig‘ini hududida yashovchi aholiga barcha turdagi pochta xizmatlari bilan birga Yagona interaktiv davlat xizmatlari portalidan foydalangan holda 15 turdagi davlat xizmatlaridan ham foydalanishlari uchun barcha imkoniyatlar yaratilgan.

Xalqning og‘irini yengil, uzog‘ini yaqin qilish, qulaylik yaratish va shaffoflikni ta’minlashga qaratilgan davlat xizmatlarini ko‘rsatishning yangicha tizimi hayotimizning ajralmas qismiga aylanib bormoqda.

Endilikda «Obod qishloq» dasturi doirasida qad roslagan zamonaviy turar joy binolarida yashovchi yurtdoshlarimiz pochta bo‘limiga kelib davlat xizmatlaridan foydalanishlari mumkin bo‘ladi.

Avvalroq Toshkent va Xorazm viloyatlaridagi pochta bo‘limlarida shunday xizmatlar yo‘lga qo‘yilgan edi.