Zamonaviy texnologiyalar va kundalik hayot o‘rtasidagi chegaralar kun sayin yo‘qolib bormoqda. AQShning Nyu-York shahrida o‘zgacha biznes-model va ulkan kelajak rejalari bilan bozorga kirib kelgan Shift nomli yangi startap butun texnologik hamjamiyat e’tiborini o‘ziga qaratdi. Loyiha foydalanuvchilarga uyni tozalash xizmatini mutlaqo bepul taqdim etadi, biroq buning evaziga o‘ta muhim bir sharti bor, tozalash jarayonida yig‘ilgan videoma’lumotlar sun’iy intellekt va kelajakdagi uy robotlarini o‘qitish uchun ishlatiladi.

An’anaviy tozalash kompaniyalaridan farqli o‘laroq, Shift o‘z mijozlaridan xizmat haqi olmaydi. Bu yerda to‘lov pulda emas, balki real hayotdagi ma’lumotlar bilan to‘lanadi. Mutaxassislar uyni tozalash chog‘ida maxsus qurilmalar va kameralar orqali xonalarning tuzilishini, buyumlarning joylashuvini hamda insonning kundalik harakatlarini yozib oladi. To‘plangan vizualizatsiya raqamli bazaga ulanib, sun’iy intellekt algoritmlarini takomillashtirishga yo‘naltiriladi. Mijoz toza va saranjom uyga ega bo‘lsa, startap kelajakdagi maishiy robotlarni dala sharoitida sinovdan o‘tkazish uchun noyob datasetga ega bo‘ladi.

Robototexnika va katta til modellari kelajakda mustaqil ravishda uy ishlarini bajarishi uchun ular millionlab soatlik real hayot ko‘rinishlarini ko‘rishi va tahlil qilishi kerak. Laboratoriya sharoitidagi sun’iy muhit real hayotning tartibsizligini, turli xil uy sharoitlarini to‘laqonli aks ettira olmaydi. Shift startapi aynan shu bo‘shliqni to‘ldirib, robotlarga hayot darslarini o‘tadigan amaliy maydonni yaratmoqda.

Tabiiyki, o‘z uyini begona kameralarga muhrlash va bu ma’lumotlarni texnologik kompaniyaga topshirish ko‘pchilikda haqli savollarni tug‘diradi. Shift rahbariyati esa maxfiylik masalasi qat’iy nazorat qilinishini, shaxsiy ma’lumotlar, hujjatlar yoki maxfiy kadrlar filtrlanib, faqatgina robotlarning harakat trayektoriyasi hamda predmetlarni farqlash ko‘nikmalari uchun zarur bo‘lgan qismlar saqlab qolinishini ta’kidlamoqda.

Nyu-Yorkda ish boshlagan bu kabi startaplar kelajakda biz foydalanadigan aqlli uy yordamchilari va robot-texnologiyalar qanday qilib tayyorlanishidan dalolat beradi. bepul xizmat ortida aslida ulkan ma’lumotlar bazasini shakllantirish strategiyasi yotibdi va ehtimol, yaqin kelajakda uylarimizni tozalaydigan robotlar aynan shunday loyihalar bazasida kamol topadi.