Fransuz kinosi afsonasi Brijit Bardo 91 yoshida vafot etdi. 

Dunyo kinosining yorqin yulduzi, 1950–1960-yillar ramziga aylangan aktrisa Brijit Bardo 28-dekabr kuni Sen-Tropedagi o‘z xonadonida olamdan o‘tdi. Bu haqda AFP agentligi xabar bermoqda.

Unga «Va xudo ayolni yaratdi» (1956) filmi olamshumul mashhurlik keltirgan. U nafaqat aktrisa, balki butun bir avlod uchun uslub va erkinlik timsoli sifatida gavdalanadi. 1973 yilda, shon-shuhratning eng yuqori nuqtasida bo‘lishiga qaramay, Bardo kinodagi faoliyatini to‘xtatishga qaror qilgan. Brijit Bardo o‘zining 21 yillik faoliyati davomida 47 ta filmda rol ijro etgan. «Haqiqat» (La Vérité, 1960) — ko‘pchilik munaqqidlar buni Bardoning aktrisa sifatidagi eng kuchli ishi deb hisoblaydi. Ushbu dramatik filmda u sudlanayotgan ayol obrazini mahorat bilan ijro etgan.

Boshqa filmlari

«Viva Mariya!» (Viva Maria!, 1965) — Bardo va Janna Moro ijrosidagi sarguzashtli komediya.

«Baxtsizlik yuz bergan taqdirda» (En cas de malheur, 1958) — afsonaviy Jan Gaben bilan birgalikda suratga tushgan jinoiy drama.

«Parijlik qiz» (Une parisienne, 1957) — aktrisaning komedik qirralarini ochib bergan film.

U umrining qolgan qismini jonivorlar huquqlarini himoya qilishga bag‘ishladi. O‘z nomidagi xayriya fondini tashkil etib, butun dunyoda hayvonlarga nisbatan shafqatsizlikka qarshi kurashdi.

Brijit Bardo Fransiyaning milliy ramzi — Marianna qiyofasi uchun prototip bo‘lgan birinchi mashhur ayol edi.