25 феврал куни эрталаб Украина президенти Владимир Зеленский мамлакат фуқароларига навбатдаги мурожаат билан чиқди.

«Фақат украиналикларнинг бирдамлиги ва қатъияти бизнинг эркинлигимизни сақлаб қолиш ва давлатни ҳимоя қилишга қодир. Армия, чегарачилар, Миллий гвардия, полиция, разведка, ҳудудий мудофаа кучлари ўз вазифаларини максимал даражада бажармоқда», — деган Зеленский.

Унинг фикрича, эртами-кечми Россия Украина билан мулоқотга киришиши керак. «Бу мулоқот қанчалик тез бошланса, Россиянинг ўзидан ҳам шунчалик кам йўқотиш бўлади», — деди у.

Нутқининг охирида Зеленский Россия фуқароларига рус тилида мурожаат қилган.

«Ҳурматли Россия Федерацияси фуқаролари! Бугун тунда улар қаҳрамон шаҳар Киевнинг турар-жойларини бомбардимон қила бошладилар. Буларнинг барчаси менга 1941 йилни эслатади. Норозилик билдириб намойишга чиққан Россия Федерациясининг барча фуқароларига айтмоқчиман: биз сизни кўрмоқдамиз. Бу сиз бизни эшитганингизни англатади, демак сиз бизга ишона бошлаяпсиз. Биз учун курашинг, урушга қарши курашинг», дейди Украина раҳбари.