Француз киноси афсонаси Брижит Бардо 91 ёшида вафот этди. 

Дунё киносининг ёрқин юлдузи, 1950–1960 йиллар рамзига айланган актриса Брижит Бардо 28 декабр куни Сен-Тропедаги ўз хонадонида оламдан ўтди. Бу ҳақда AFP агентлиги хабар бермоқда.

Унга «Ва худо аёлни яратди» (1956) фильми оламшумул машҳурлик келтирган. У нафақат актриса, балки бутун бир авлод учун услуб ва эркинлик тимсоли сифатида гавдаланади. 1973 йилда, шон-шуҳратнинг энг юқори нуқтасида бўлишига қарамай, Бардо кинодаги фаолиятини тўхтатишга қарор қилган. Брижит Бардо ўзининг 21 йиллик фаолияти давомида 47 та филмда рол ижро этган. «Ҳақиқат» (La Vérité, 1960) — кўпчилик мунаққидлар буни Бардонинг актриса сифатидаги энг кучли иши деб ҳисоблайди. Ушбу драматик фильмда у судланаётган аёл образини маҳорат билан ижро этган.

Бошқа фильмлари

«Вива Мария!» (Viva Maria!, 1965) — Бардо ва Жанна Моро ижросидаги саргузаштли комедия.

«Бахтсизлик юз берган тақдирда» (En cas de malheur, 1958) — афсонавий Жан Габен билан биргаликда суратга тушган жиноий драма.

«Парижлик қиз» (Une parisienne, 1957) — актрисанинг комедик қирраларини очиб берган фильм.

У умрининг қолган қисмини жониворлар ҳуқуқларини ҳимоя қилишга бағишлади. Ўз номидаги хайрия фондини ташкил этиб, бутун дунёда ҳайвонларга нисбатан шафқатсизликка қарши курашди.

Брижит Бардо Франциянинг миллий рамзи — Марианна қиёфаси учун прототип бўлган биринчи машҳур аёл эди.