Франциянинг собиқ президенти Франсуа Олланд 2027 йилги президентлик сайловларида иштирок этиши мумкинлигини маълум қилди.

«Мен тайёргарлик кўряпман. Президентлик сайловларида Франция учунгина эмас, балки бутун тарих учун муҳим масала ҳал бўлади», – деди у Marianne журналига берган интервьюсида.

Олланд 2012–2017 йилларда Францияга раҳбарлик қилган ва Бешинчи республика тарихидаги энг паст рейтинг билан лавозимни тарк этган президентлардан бири сифатида тилга олинади. 2017 йилда у Елисей саройини атиги 4 фоизлик қўллаб-қувватлаш рейтинги билан тарк этган эди.

Ҳозирча унинг сиёсий имкониятлари юқори баҳоланмаяпти. Сўровларга кўра, Олландни 10 фоиздан кам сайловчи қўллаб-қувватламоқда.

Айни пайтда ўнг қанотдаги «Миллий бирлашув» партияси юқори кўрсаткичларни сақлаб турибди. Партия етакчилари Марин Ле Пен ва Жордан Барделла 30 фоиздан ортиқ қўллаб-қувватловга эга.

Қизиғи, айнан Олланд президентлиги даврида Францияда ўта ўнг кучлар мамлакатнинг асосий сиёсий ўйинчиларига айланган эди.

Скептик муносабат ҳатто Олланд аъзо бўлиб қолaётган Социалистик партия ичида ҳам кузатилмоқда. Партия вакилларидан бири Marianne’га унинг сиёсатга катта қайтиш қилиши эҳтимолига ишонмаслигини айтган.

Шунга қарамай, Олланд ўзининг асосий устунлиги сифатида давлат раҳбари даражасидаги тажрибасини кўрсатмоқда. У беш йиллик президентлик фаолияти, халқаро саммитлардаги иштироки ва инқирозлар даврида мамлакатни бошқарганини эслатган.