«El Mundo» нашри Россия президенти Владимир Путинга 10 йил аввалгидан ёшроқ, дея таъриф берди.

Испан журналистлари 66 ёшли Путиннинг «абадий ёшлик» сирини вақтида ухлаши, спорт билан шуғулланиши, тўғри овқатланиши ҳамда алкоголдан воз кечишида кўрмоқда.

«Путин — Кремль гувоҳ бўлган энг спортга ихлос қўйган президент», — деб ёзади газета. — «Президент хоккей ишқибози, дзюдо бўйича саккизинчи дан соҳиби, сузиш ва пиёда сайр қилишни ёқтиради».

Шунингдек, мақола муаллифлари унинг ташқи кўринишига ҳам аҳамият беришган. Нашрда келтирилишича, президент «Kiton» ва «Brioni» костюмларини афзал кўраркан.

Россия етакчиси қарийб 50 йилдирки, шарқ яккакураши билан шуғулланади, дзюдо ва самбо бўйича спорт устаси унвонларига эга. Карате бўйича қора белбоғ соҳиби. 2018 йил июлда футбол бўйича Россия терма жамоаси ҳужумчиси Артём Дзюба президент Владимир Путиндан «конькини бутсига алмаштиришни» сўраган. Бунга жавобан давлат раҳбари спортчи эмас, физкультурачи эканлигини, шунинг учун «биратўла ҳаммаси билан» шуғулланишини айтган.