Исроилда ҳаво ҳужумини қайтарувчи ракеталар тугамоқда. 

Semafor нашрининг АҚШ расмийларига асосланиб хабар беришича, бу ҳафта Исроил Вашингтонни Эрон ва унинг иттифоқчилари ҳужумларидан ҳимоя қилиш учун тўхтатувчи ракеталарнинг жиддий етишмовчилиги ҳақида хабардор қилди. 

Нашр манбаларининг таъкидлашича, Исроил Эронга қарши қуролли можарога чекланган тўхтатувчи ракета захираси билан кирган. Уларнинг айтишича, армия ўтган ёзда Эрон билан тўқнашувлар пайтида ракеталарининг катта қисмини сарфлаган.

Бироқ, Оқ уй бу етишмовчиликдан ҳайратда қолмади:«Бу биз кутган ва олдиндан кўрган нарса эди», деди АҚШ расмийларидан бири нашрга. 

Semaforʼнинг манбасига кўра, АҚШ тўхтатувчи ракеталарнинг етишмаслигини бошдан кечирмаяпти ва Вашингтон Яқин Шарқдаги иншоотларини ҳимоя қила олади. Бироқ, АҚШ ракеталарни Исроилга сотадими ёки топширадими, ҳали ҳам номаълум, чунки бу унинг ўз арсеналига путур етказиши мумкин. 

Исроил ҳужумлардан ҳимояланишнинг бошқа усулларига ҳам эга - масалан, унинг қуролли кучлари қирувчи самолётлардан фойдаланиши мумкин. Бироқ, тўхтатувчи ракеталар узоқ масофали ўқ отишларга қарши энг самарали воситадир.