Суд Малайзиянинг собиқ бош вазири Нажиб Тун Разакни 1MDB давлат жамғармасидаги коррупция схемалари билан боғлиқ ҳолда 15 йилга озодликдан маҳрум қилиш ва 11,4 миллиард ринггит (тахминан 222,2 миллиард рубл) жаримага тортди, деб хабар берди The Star. 

Нажиб Разак ҳокимиятни суиистеъмол қилишнинг тўртта айблови бўйича 15 йилга ва пул ювиш бўйича 21 та айбловнинг ҳар бири учун беш йилга озодликдан маҳрум қилинди. 

 Нажиб Разакнинг ҳимояси гаров пулини қайтаришни сўради ва суд уларни қаноатлантирди. Собиқ бош вазирнинг адвокати ҳимоя ҳозирда ижрони тўхтатиб туришни сўрамаслигини айтди. 

72 ёшли Нажиб Разак 2009 йил апрелидан 2018 йил майигача Малайзия бош вазири бўлиб ишлаган. Ўша йилнинг июл ойида у коррупцияда гумон қилиниб ҳибсга олинган. 2020 йилда Малайзия Олий суди уни 1MDB коррупция можароси билан боғлиқ ҳолда ҳокимиятни суиистеъмол қилиш, маблағларни ўзлаштириш ва пул ювишда айбдор деб топди.

Нажиб Разак 12 йилга озодликдан маҳрум қилинди ва қарийб 44 миллион доллар жаримага тортилди. 2024 йилда жазо муддати олти йилгача (2028 йил 23 августгача) қисқартирилди ва жарима асл сумманинг чорак қисмигача камайтирилди. 

1MDB 2015 йилда йирик коррупция можаросининг марказида бўлган. Унинг фаолияти аудити натижасида 11 миллиард доллар қарздорлик аниқланди. Тергов Малайзиянинг юқори лавозимли амалдорлари иштирокидаги коррупция схемаларини фош қилди ва бу сумманинг 700 миллион доллари Нажибнинг шахсий ҳисобларидан топилди.