Путин БААни Трамп билан учрашиш учун қулай жойлардан бири деб атади.

«Бундай тадбирни ташкил этишда бизга ёрдам беришга тайёр бўлган кўплаб дўстларимиз бор. Дўстларимиздан бири БАА президенти. Ўйлайманки, биз бир қарорга келамиз. Лекин бу жуда мос жойлардан бири бўларди», - деди Россия президенти.

Аввалроқ Кремл учрашув ўтказиладиган жой аллақачон келишиб олингани, бироқ кейинроқ эълон қилинишини маълум қилганди.

Путиннинг айтишича, унинг АҚШ раҳбари билан учрашувига ҳар икки томон - Россия ва АҚШ қизиқиш билдирган. Унинг қўшимча қилишича, умуман олганда, Зеленский билан учрашишга ҳам бирор қаршилик йўқ, лекин бунинг учун аниқ шароитлар яратилиши керак.

Бир муддат аввал Ғарб матбуоти Трамп Россия етакчиси билан учрашувдан кейин Путин ва Зеленский билан уч томонлама музокаралар ўтказиши ҳақида ёзганди.

АҚШ Давлат котиби Марко Рубионинг айтишича, АҚШ расмийлари биринчи марта Россия урушни тугатиш учун нима талаб қилиши мумкинлиги ҳақида аниқ тасаввурга эга. Гап энди украиналикларда қолган.