Дональд Трамп «Грэмми» мукофоти маросими бошловчиси Тревор Ноани судга беришини маълум қилди. Бу ҳақда Америка етакчиси ўзининг Truth Social ижтимоий тармоғида ёзди.

Бошловчи маросим вақтида АҚШ президентининг педофилияда айбланган молиячи Жеффри Эпштейн билан алоқалари ҳақида ҳазил қилган.

Трамп ғазабига сабаб бўлган ҳазилда бошловчи президент Гренландия ҳақида орзу қилаётганини айтиб, «чунки унга Билл Клинтон билан вақтичоғлик қилиш учун янги орол керак» деган.

«Мен ҳеч қачон Эпштейн оролида ёки унинг атрофида бўлмаганман. Бугунги ёлғон ва туҳматли баёнотга қадар бу ҳақда мени ҳеч қачон айблашмаган, ҳатто сохта ОАВлар ҳам», — деди Оқ уй раҳбари.

У бошловчини «омадсиз», «бечора, истеъдодсиз, аҳмоқ рэпер» деб атади ва уни фактларни ўрганишга чақирди.

«Кичик Жорж Слопадополусдан ва бошқалардан сўра — бунинг бари нималар билан тугаганини билиб оласан. CBS’дан ҳам сўра! Тайёр тур, Ноа, мен сен билан вақтичоғлик қиламан!» — деб ёзди Трамп.

«Грэмми» мукофотини топшириш маросими 1 февраль куни бўлиб ўтди. Қўшиқчи Билли Айлиш Wildflower таронаси билан «Йил қўшиғи» номинациясида ғалаба қозонганидан сўнг, бошловчи ҳар бир артист бу мукофотни орзу қилишини, худди АҚШ президенти Гренландияни орзу қилганидек, деб ҳазилини бошлаган.

«Бу ажабланарли эмас, чунки Эпштейн ўлимидан кейин унга ва Билл Клинтонга вақтичоғлик қилиш учун янги орол керак», — деди Тревор Ноа.

Эпштейн файлларида Трамп

30 январь куни АҚШ Адлия вазирлиги молиячи Жеффри Эпштейн иши бўйича махфийликдан чиқарилган ҳужжатларнинг янги қисмини эълон қилди. The New York Times (NYT) газетаси файлларни таҳлил қилиб, улар орасида 5300 та ҳужжатда Трамп ва у билан боғлиқ исмлар ҳамда атамалар 38 минг мартадан ортиқ тилга олинганини аниқлади. Масалан, унинг қариндошлари исмлари ёки Мар-а-Лаго қароргоҳи.

«Трамп тилга олинган кўплаб ҳужжатлар — бу Эпштейннинг электрон почтасига тушиб қолган янгиликлар, мақолалар ва бошқа очиқ манбалардир. Бу файлларнинг ҳеч бирида Трамп билан Эпштейн ўртасидаги тўғридан-тўғри ёзишмалар йўқ», — дейилади мақолада.

Шу билан бирга, нашр қайд этганидек, бу файлларнинг фақат оз қисми 2000-йиллар бошига, яъни Трамп ва Эпштейн дўст бўлган даврга тааллуқли. Ҳужжатларда АҚШ президенти томонидан қандайдир қонунбузарликлар содир этилгани ҳақида маълумот йўқ. Бироқ файлларда Эпштейн қурбонлари билан ўтказилган интервьюлардан ёзувлар ва стенограммалар бор. Айримларида Трамп билан бўлган мулоқотларини эслаган. Масалан, қурбонлардан бири уни қора-яшил рангли машинада Мар-а-Лагога, Трамп билан учрашувга олиб боришганини айтган.

Эпштейн иши

«Бошқа бир ҳужжатда Эпштейн учун ишлаган Хуан Алесси терговчиларга Трамп ҳам бошқа машҳур шахслар қатори Эпштейннинг уйига келиб турганини қайд этган», — деб ёзади NYT.

Нашрнинг қўшимча қилишича, Эпштейн Трамп билан муносабатлар узилгандан кейин ҳам уни кузатиб борган. Хусусан, АҚШ президентининг сиёсий карьераси билан қизиқиб, буни ўз манфаатлари йўлида ишлатмоқчи бўлган.

Трампнинг сиёсий рақиблари узоқ вақт давомида «Эпштейн файллари»ни республикачилар вакилига қарши ишлатишга уринган. Аммо минглаб ҳужжатлар орасида сиёсатчи томонидан содир этилган жиноятларга далиллар ҳам, Трамп билан миллиардер ўртасидаги шахсий ёзишмалар ҳам мавжуд эмас.

Мутахассислар фикрича, Эпштейн иши ҳали узоқ вақт давомида кун тартибига чиқиб туради. Хусусан, ички сиёсатдаги босимни камайтириш умидида Трамп ташқи сиёсий фаолликни кучайтиришга ҳаракат қилади: Гренландия масаласида, шунингдек Куба ва Эрон йўналишида кескин ҳаракатлар бўлиши мумкин.