Америкалик иқтисодчи, иқтисодиёт бўйича Нобел мукофоти лауреати Пол Кругманнинг айтишича, Хитойда японча дефляция ва ёшларнинг юқори ишсизлик даражаси «турғунлик ва умидсизлик» даври бошланганидан далолат беради. Унинг сўзларини The New York Times нашри келтирган.

Унинг сўзларига кўра, бир қатор таҳлилчилар Хитойда коронавирус чекловлари олиб ташланганидан кейин кескин иқтисодий ўсиш бўлишини кутишган, бироқ бунинг ўрнига мамлакат ЯИМдан (тахминий 5,2 фоизга ўсган)ташқари деярли барча кўрсаткичлар бўйича ортда қолган.

Иқтисодчи Хитойнинг расмий статистик маълумотларига таяниб, мамлакатда 1980 йиллардаги Япония сценарийси каби дефляция ва ёшлар ўртасидаги ишсизлик даражаси юқори эканлигини таъкидлайди. «Бу тўлиқ инқироз эмас, ҳеч бўлмаганда ҳали эмас, лекин Хитой турғунлик ва умидсизлик даврига кирмоқда, дейишга асос бор», дейди Нобел мукофоти лауреати.

Кругман бундай вазиятнинг сабаблари сифатида хусусий ташаббуснинг синдирилиши, «молиявий репрессия» (жамғарма учун паст фоиз тўлаш ва имтиёзли қарз олувчиларга арзон кредитлар бериш), шунингдек, оилаларда юзага келиши мумкин бўлган фавқулодда вазиятларда тежашга мажбур қиладиган заиф ижтимоий хавфсизлик тармоғини келтирди.

«Агар сизда 2000 йилларнинг бошларида Хитойда бўлгани каби иш кучи ва унумдорлик тез ўсиши бўлса, сармоянинг юқори суръатлари самарали бўлиши мумкин. Аммо Хитойнинг меҳнатга лаёқатли аҳолиси 2010 йилда энг юқори чўққисига чиқди ва ўшандан бери қисқаришда давом этмоқда. Мамлакат айрим соҳаларда таъсирчан технологик имкониятларни намойиш этган бўлсада, унинг умумий унумдорлиги ҳам тўхтаб қолгандек кўринади», — дейди иқтисодчи.

Кругманнинг фикрича, Хитой ўз даромадларини кўпроқ уй хўжаликларига ўтказиши ва инвестиция харажатларини камайтириш учун ижтимоий хавфсизлик тармоғини кучайтириши керак.

Аввалроқ Хитой Миллий статистика бюроси мамлакатда ўлим даражаси рекорд даражада бўлгани ва туғилиш даражаси пасайганини маълум қилганди. Маълумотларга кўра, 2023 йилда аҳоли сони 2 миллионга камайган ва 1,41 миллиард кишига этган.