28 апрель куни Яман махсус хизматлари ўтказилган ҳарбий амалиётлар чоғида минтақадаги ИШИД террорчилик гуруҳининг маҳаллий етакчиларидан бирини йўқ қилди ҳамда 3 нафар жангарини қўлга олди. Бу ҳақда «Риа Новости» махсус хизматдаги манбага таяниб хабар бермоқда.

«ИШИД террорчилик гуруҳи назорати остида бўлган Адан-Абян вилояти амири Салоҳ Наср ал-Бахши Яман махсус хизматлари томонидан ўтказилган терроризмга қарши кураш амалиёти чоғида ўзи яшириниб олган бинода ўлдирилди», дея маълум қилган манба.

Унинг сўзларига кўра, Ал-Бахши таслим бўлишдан бош тортган ва отишма пайтида ўлдирилган. Шунингдек, яна бир нафар ҳарбий ҳам вафот этган, икки нафари эса тан жароҳати олган. Рейд давомида террорчилардан қуроллар, мобил телефонлар, компьютер планшетлар тортиб олинган ва 3 нафар жангари қўлга олинган.

Эслатиб ўтамиз, Яманда 2014 йилдан буён ички сиёсий инқироз давом этмоқда. Бундан фойдаланган ИШИД гуруҳи эса мамлакатда ўз мавқеини мустаҳкамлашга уриниб келмоқда.