2026 йил 1 сентябрдан Ўзбекистонда бюджет ташкилотлари ходимларининг иш ҳақи ва талабалар стипендиялари 7 фоизга оширилади. Шунингдек, меҳнатга ҳақ тўлашнинг энг кам миқдори ҳамда базавий ҳисоблаш миқдорининг янги қийматлари кучга киради.

Президентнинг 23 июндаги фармонига мувофиқ:

• меҳнатга ҳақ тўлашнинг энг кам миқдори 1 млн 271 минг сўмдан 1 млн 360 минг сўмга;
• Базавий ҳисоблаш миқдори эса 412 минг сўмдан 440 минг сўмга етказилади.

Бу 2026 йилдаги ижтимоий тўловлар ва даромадларни индексация қилишнинг иккинчи босқичи ҳисобланади. Аввалроқ, 1 июлдан пенсиялар, нафақалар ва Ижтимоий реестрга киритилган оилаларга бериладиган моддий ёрдамлар ҳам 7 фоизга оширилган.

Июл ойидаги оширишдан кейин энг кам ёшга доир пенсия 983 минг сўм, ногиронлик пенсиясининг энг кам миқдори эса 1 млн 83 минг сўм этиб белгиланган.

Эслатиб ўтамиз, БҲМнинг ошиши давлат божлари, йиғимлар, жарималар ва бошқа қатор тўловлар миқдорининг ҳам ошишига олиб келади.