Ҳар куни нонушта қилиш нафақат саломатликни яхшилайди, балки ўсмирларда депрессив аломатлар хавфини камайтиради.

Бу хулосага хитойлик олимлар бир ярим йил давомида 2500 дан ортиқ мактаб ўқувчиларини кузатгандан сўнг келишди. Тадқиқот натижалари Nutrients журналида чоп этилди. 

Тадқиқотда Шанхайдан 2502 нафар ўсмир иштирок этди. Тадқиқот бошида ва тахминан 18 ойдан сўнг, тадқиқотчилар ўқувчиларнинг нонушта қилиш частотаси, қанча ухлашлари ва уларда депрессия белгилари бор-йўқлигини баҳоладилар. Кузатув даврида ҳар куни нонушта қиладиган ўсмирларнинг улуши 81,1 фоиздан 76,1 фоизгача камайди. Шу билан бирга, депрессив аломатларнинг тарқалиши 15,3 фоиздан 18,5 фоизгача, уйқусизликнинг тарқалиши эса 89,5 фоиздан 92,9 фоизгача ошди.

Таҳлил шуни кўрсатдики, ҳар куни нонушта қилиш ҳаётнинг кейинги босқичларида депрессив аломатлар пайдо бўлиш хавфини камайтириши, шунингдек, уйқу давомийлигини узайтириши билан боғлиқ. Бундан ташқари, уйқу ва руҳий саломатлик ўртасида икки томонлама боғлиқлик аниқланди: уйқунинг етарли эмаслиги депрессив аломатлар эҳтимолини оширди ва депрессив аломатларнинг ўзи кейинчалик уйқу давомийлигининг қисқариши билан боғлиқ эди. 

Муаллифлар нонушта мия фаолияти учун муҳим бўлган озуқа моддалари орқали, шунингдек, организмнинг циркадиялик ритмларини қўллаб-қувватлаш орқали кайфиятга таъсир қилиши мумкинлигини таъкидлайдилар.