Россияда ёш бола ҳаётини сақлаб қолган ўзбекистонлик «Жасорат» медали билан тақдирланди. 

Бу ҳақда Ўзбекистон Президентининг фармони эълон қилинди. 

«Россия Федерациясининг Санкт-Петербург шаҳрида содир бўлган фавқулодда ва мураккаб вазиятда ўз жони ва саломатлигини хавф остига қўйиб, кўп қаватли уйнинг юқори қисмидан пастга қулаб тушаётган ёш болага амалий ёрдам кўрсатгани ва унинг ҳаётини сақлаб қолгани, халқимизга хос юксак жасорат, қаҳрамонлик ва фидойилик фазилатларини яққол намоён этгани учун мард ва жасур юртдошимиз Ибадуллаев Хайрулло Сайдуллаевич «Жасорат» медали билан мукофотлансин», дейилади фармонда.

Ҳодиса Санкт-Петербургнинг Петрозаводская кўчасида содир бўлган. Бола очиқ дераза ёнида ўйнаб юрганида йиқилиб, карнизга илиниб қолган. Ибадуллаев қўлларини узатиб, уни ушлаб олишга муваффақ бўлган. 

 Кейин у дарҳол болани кириш эшигига олиб кирган, у ерда қўшнилар ва қутқарувчининг ўзи тез тиббий ёрдам ходимлари етиб келгунига қадар биринчи тиббий ёрдам кўрсатган.