Тошкент шаҳар Ички ишлар бош бошқармаси таъмирлаш ишлари олиб борилаётгани муносабати билан бир неча кўча ва йўлларда автотранспортлар ҳаракати вақтинча чеклангани ҳақида маълум қилди.

Жумладан, 24 июндан бошлаб, совуқ сув қувурларининг алмаштирилиши туфайли (таъмирлаш ишлари тахминан бир ой давом этади) Фарғона йўли кўчасининг Нукус кўчасидан Толимаржон кўчасигача бўлган ҳаракатланиш қисми (қарама-қарши томондан ҳаракатланиш йўли очиқ) ёпилган. Аммо Меҳржон кўчаси орқали айланиб ўтиш учун йўл ташкил қилинган.

Метрополитен йўналиши қурилиши муносабати билан 23 июндан то қурилиш ишлари якунлангунча қадар Элбек кўчасининг Авиасозлар кўчасидан Алимкент кўчасигача бўлган қисми («Дўстлик» метро бекати) ёпилган. Ҳайдовчиларга қулайлик яратиш мақсадида Алимкент кўчаси бўйлаб автотранспортларнинг икки томонлама ҳаракати йўлга қўйилди.

Бунёдкор кўчасининг Кичик халқа йўли билан кесишган қисмида капитал ишлари олиб борилаётгани муносабати билан 25 июндан Бунёдкор кўчасининг Муқимий кўчасидан Қатортол 2-тор кўчасигача бўлган қисмида транспортлар ҳаракати чекланади. Қатортол 2-тор кўчаси, Дўмбирабод 4-тор кўчаси, Чилонзор кўчаси, Қатортол кўчаси ва кичик ҳалқа йўли орқали айланиб ўтиш йўллари ташкил қилинган.

Тошкент шаҳар ИИББ юзага келган ноқулайлик учун узр сўраган.