2026 йилги футбол бўйича жаҳон чемпионатининг иккинчи чорак финалида Испания Белгияни 2:1 ҳисобида мағлуб этди. Учрашув 10 июл, жума куни кечқурун Лос-Анжелес яқинидаги Инглвуд шаҳри стадионида бўлиб ўтди.

«Қизил фурия»нинг ўйиндаги устунлиги учрашувнинг 30-дақиқасида самара берди. Дани Олмонинг зарбасини Белгия посбони Тибо Куртуа қайтарганидан кейин биринчи бўлиб етиб келган Фабиан Руис тўпни дарвозага йўллади. Орадан 11 дақиқа ўтиб, белгияликлар ҳисобни тенглаштиришди. Шарл де Кетеларе киритган гол Испаниянинг ушбу чемпионатда ўтказиб юборган илк голи бўлди.

Иккинчи бўлим бошланиши билан ўйин суръати сезиларли даражада ошди. Ҳар икки жамоа ҳам ҳужумкор ўйинга таяниб, ўзаро қарши ҳужумлар уюштирди. Учрашувнинг 71-дақиқасида Белгия асосий дарвозабони жароҳат олиб, майдонни тарк этиши ўйинда бурилиш ясади. Захирадан тушган Ламменснинг тўпни қўлдан чиқариб юбориши қимматга тушди: асосий вақт тугашига икки дақиқа қолганда Микел Мерино унинг дарвозасига ҳал қилувчи голни киритди. Мерино 1/8 финалда Португалияга қарши баҳсда ҳам Испаниянинг ҳал қилувчи ва ягона голига муаллифлик қилган эди.

ЖЧ-2026 ярим финалида Испания Францияга қарши майдонга тушади. Французлар чорак финалда Марокаш устидан ишочли ғалаба қозониб, кейинги босқичга йўл олган эди. Ушбу баҳс 14 июл куни Арлингтонда (Техас штати, Даллас) бўлиб ўтади.

Чорак финал ва плей-оффнинг кейинги босқичларидаги барча учрашувлар АҚШ стадионларида ўтказилмоқда. 11 июл куни кечқурун (бизнинг вақт билан 12 июл тунги соат 02:00 да бошланади) Майами шаҳридаги стадионда Норвегия ва Англия терма жамоалари ярим финал йўлланмаси учун майдонга тушади. 12 июл тонгги соат 06:00 да эса Канзас-Сити шаҳрида Аргентина ва Швейцария терма жамоалари ўйини бошланади. Ушбу жуфтликлар ғолиблари 15 июл куни Атланта шаҳрида бўлиб ўтадиган иккинчи ярим финалда тўқнаш келади.