Адлия вазирлиги матбуот хизматидан хабар беришларича, кеча, 19 апрель куни Адлия вазирлиги ва БМТ Тараққиёт дастури ўртасида «Ўзбекистондаги самарали, ҳисоб берувчи ва шаффоф бошқарув институтлари орқали коррупцияга қарши кураш» лойиҳасини амалга ошириш бўйича келишув имзолаш маросими бўлиб ўтди.

8 миллион АҚШ доллари бюджетга эга ушбу лойиҳа коррупцияга қарши кураш бўйича йирик комплекс чора-тадбир ҳисобланиб, деярли барча соҳаларни қамраб олган. У уч йилга мўлжалланган.

Лойиҳа Адлия вазирлиги, Бош прокуратура томонидан мамлакатимиз вазирлик ва идоралари ҳамда БМТТД билан ҳамкорликда ишлаб чиқилган. У уч йилга мўлжалланган бўлиб, ҳамкорликнинг қуйидаги йўналишларини ўз ичига олган:

— коррупцияга қарши кураш бўйича миллий қонунчиликни ҳар томонлама таҳлил қилиш, уни такомиллаштириш ва халқаро экспертлар иштирокида коррупцияга қарши кураш соҳасидаги халқаро шартномалар доирасида халқаро стандартлар, давлат мажбуриятларига мослаштириш; 

— коррупцияга қарши кураш соҳасидаги билим ва кўникмаларни янада такомиллаштиришга қаратилган давлат хизматчиларини тайёрлашнинг инновацион методикаларини ишлаб чиқиш ва жорий қилиш, хорижий мамлакатларнинг ушбу соҳадаги илғор тажрибасини ўрганиш ва орттирилган билимларни юртимиз ташкилотлари фаолиятига имплементация қилиш;

— энг сўнгги ускуналар, дастурий таъминот билан таъминлаш орқали коррупцияга қарши курашиш бўйича тадбирларни ўтказиш мақсадида Ўзбекистон Республикаси ташкилотларига техник кўмак кўрсатиш, бу эса ўз навбатида давлат органи ва фуқаро ўртасида интерактив мулоқотни йўлга қўйиш, аҳолига давлат хизматлари кўрсатиш тартибини соддалаштириш, давлат органларига мурожаат чоғида бюрократия тўсиқларини бартараф қилиш, самарали ҳужжат айланиши ҳамда коррупциянинг олдини олиш учун давлат хизматлари шаффофлигини таъминлашга хизмат қилади.

— коррупцияга қарши кураш йўлидаги саъй-ҳаракатларни қўллаб-қувватлаш мақсадида янги технологиялардан фойдаланган ҳолда билим ва кўникмаларни тарқатиш ва тарғиб қилиш орқали жамиятда коррупцияга тоқат қила олмаслик маданиятини ривожлантириш. Ҳукумат, фуқаролик жамияти ва хусусий сектор ўртасида фаол ҳамкорликни ривожлантириш, жамиятда коррупцияга тоқат қила олмасликни ривожлантиришга қаратилган ягона медиа-стратегия ва ахборот кампанияларини ишлаб чиқиш ва амалга ошириш.

— Ўзбекистон Республикасининг коррупцияга қарши кураш бўйича халқаро институтлар билан ҳамкорлигини ривожлантириш, уларнинг фаолиятида фаол иштирок этиш, бу эса ўз навбатида коррупцияга қарши кураш бўйича давлатимиз олдида турган муаммоли масалаларни ҳал этишга хизмат қилади.

Ушбу глобал лойиҳанинг асосий вазифаси коррупцияга қарши кураш соҳасидаги давлат сиёсатини самарали амалга оширишдан иборат.